Terezeden qulaǵaly turǵan balany qutqarǵan elordalyq Esdáýlet Dáýitbekov «Tótenshe jaǵdaidaǵy erligi úshin» tósbelgisimen marapattaldy, dep habarlaidy QazAqparat Tótenshe jaǵdailar ministrliginiń baspasóz qyzmetine silteme jasap.
«Búgin Tótenshe jaǵdailar ministrliginde ministr Iýrii Ilin erligimen kózge túsken Dáýitbekov Esdáýlet Esbolatulyn «Tótenshe jaǵdaidaǵy erligi úshin» tósbelgisimen jáne estelik syilyqpen marapattady. Kezdesýge batyrdyń anasy Ásemgúl Qabdyqalyqova da qatysty», - delingen resmi habarlamada.
Iýrii Ilin búginginiń batyryna alǵys bildirip, bolashaqta TJM azamattyq qorǵaý organdarynyń qatarynan osyndai er jigitterdi kórgisi keletinin aitty. Sonymen qatar, anasyna naǵyz batyrdy tárbielegeni úshin alǵys bildirdi.
Eske salsaq, oqiǵa 13 shildede Nur-Sultandaǵy «Sherqala» turǵyn úi kesheninde bolǵan. 17 jastaǵy bozbala qutqarý bólimsheleri kelgenge deiin kórshi úidiń terezesinen ótip, 7-qabattan qulaǵaly turǵan balany qutqarǵan edi.
Oqý-aǵartý ministri Ashat Aimaǵambetov elordalyq mektep túlegi Esdáýlet Dáýitbekovke bilim grantyn tabystady.
Sondai-aq, elordalyq metsenat 3 bólmeli páter syilady.
Osy oraida, tótenshe jaǵdailar ministrligi turǵyndarǵa eskertedi:
«Qurmetti ata-analar, bul – bala aman-esen qutqarylǵan az ǵana mysaldardyń biri. Biraq, ókinshke qarai, qaiǵyly aiaqtalatyn oqiǵalar kóp kezdesedi. Balalardy eresekterdiń qaraýynsyz qaldyrmańyz! Eger úide kishkentai bala bolsa, terezelerdi ashyq qaldyrmańyz, óitkeni balanyń qulaýyna sanaýly ǵana sekýndtar jetkilikti. Bul bala ólimine ákep soǵýy ábden múmkin».
