Qaraǵandy aimaǵynyń biregei týristik nysandaryn damytýdyń keleshegi týraly kenshiler mekeninde týrindýstriia ókilderi keleli keńes qurdy. Óńirde bar týrizm oryndarynyń bolashaǵy men búgini haqynda birqatar pikirler toǵysqan kezdesýdegi túiin – týrizm keń qulash jaia almai otyr. Sondyqtan, bul oraida ońtaily shara men tabysqa bastaityn baǵyt-baǵdar kerek. Mamandardyń aitýynsha, elimiz «EKSPO» kórmesinen keiin týristik elderdiń tórttiginiń tiziminde. Desek te, bul – álem elderiniń arasynda 81-shi oryn. Qaraǵandy aimaǵynda sheteldik qonaqtardyń kelýi úsh esege artqanymen týrizmniń órken jaiýy – kemshin.
Bul kezdesýde týrizm, bilik ókilderi men investorlar pikir almasty. Aimaqtyń kóz tartarlyq oryndary men tyń jobalar jariia etildi. «Qazaq týrizmi» AQ málimetinshe, el ishindegi týristerdiń sany 5 millionǵa jýyq eken. Endigi mindet – osy ishki týrister sanyn arttyrý.
Qairat SÁDÝAQASOV, «Qazaq týrizmi» AQ basqarma tóraǵasynyń orynbasary:
– Búginde el ishinde 5 millionǵa jýyq otandyq týrist bar. Bul kórsetkishti 2023 jylǵa qarai 12 millionǵa deiin jetkizýdi josparlap otyrmyz. Syrtqy týrizmde de múmkindik zor. Sol sebepti, 2023 jylǵa qarai bizdiń sheteldik týristerdi 5 millionǵa jetkizý josparda bar.
Derekterge súiensek, jalpy, Qaraǵandy oblysynda, ekotýrizmge suranys joǵary kórinedi. Mysaly, Osakarov aýdanyndaǵy «Buirataý» ulttyq tabiǵi parkine qyzyǵýshylyq aitarlyqtai eken.
Mariia REDNIKOVA, «Buirataý» ulttyq parkiniń ókili:
– Syrt elden kelgender Qazaqstannyń ásem tabiǵatyn tamashalaýdy unatady. Tabiǵat aiasynda janýarlar dúniesimen de tanysýǵa munda múmkindik bar.
Sheteldik týristerdiń Qazaqstanǵa kelýine kedergi keltiretin sebep – qyzmet kórsetý men joldardyń sapasy bolsa kerek. Mamandardyń málimdeýinshe, sheteldik týrister úshin atalǵan eki faktor asa mańyzdy. Bul oraida kem-ketikter joq emes. Al, ózimizdiń otandastar úshin mundai demalys oryndary, tek, senbi-jeksenbi kúnderi ǵana qyzmet kórsetedi. Degenmen de, munda da suranys joq emes.
Týristik agenttik ókilderi bizdiń aimaqtaǵy demalys oryndarynda tolyqqandy demalysqa barlyq jaǵdai jasalǵan deidi. Tabiǵaty tartymdy, saýyqtyrý keshenderi jeterlik.
Svetlana NEChAEVA, týristik agenttik direktory:
– Mysaly, Qarqaraly óte jaqsy damyǵan, Priozersk saýyqtyrý kesheni de aýyz toltyryp aitarlyqtai. Biz ony jergilikti turǵyndarǵa jarnamalaýdan, jetkizýden talmaimyz. Tipti, sizge shetelge barýdyń qajeti joq. Bizde bári bar, ári laiyqty.
Qaraǵandy oblysy ákiminiń orynbasary Almas Aidarov Qaraǵandy aimaǵynda týrizmdi damytýda ósim baryn aitady. Áleýettiń de az emestigin jetkizdi. Tek, qolda bardy jetildirý kerek-ti.
Almas AIDAROV, Qaraǵandy oblysy ákiminiń orynbasary:
– Týrizmdi damytýda ósim baiqalady. Jyl ótken saiyn kórsetkishter artyp keledi. Jalpy, Qarqaraly, Balqash, Jezqazǵanda jáne Ulytaýda jumysty jetildirý qajet. Aimaqtyń áleýeti zor.
Kezdesýdi Qaraǵandy oblysy ákimdiginiń jáne kásipkerler palatasynyń qoldaýymen «Týrizm, meimanhana, meiramhana isiniń Ortalyq Qazaqstan qaýymdastyǵy» uiymdastyrǵanyn atap ótken jón. Keleshekte qaýymdastyq otandyq týrizmdi damytý jáne qoldaý akademiiasyn ashýdy jobalap otyr.
Qyzǵaldaq AITJANOVA
