Jergilikti atqarýshy organdardyń 296 mlrd teńge somasyna qarajatty tiimsiz jumsaǵany anyqtaldy. Bul týraly Parlament palatalarynyń birlesken otyrysynda Qarjy ministri Erulan Jamaýbaev málim etti, dep habarlaidy QazAqparat.
«Esep komiteti barlyq memlekettik aýdit organdary anyqtaǵan tiimsiz paidalanylǵan qarajat kóleminiń óskenin atap ótti. Shyn máninde, talaptardy buzýshylyqtardyń ósýi óńirlerdegi tekserý komissiialarynyń júrgizgen tiimdilik aýditi aiasynyń aitarlyqtai keńeiýine bailanysty. Nátijesinde, jergilikti atqarýshy organdardyń 296 mlrd teńge somasyna qarajatty tiimsiz jumsaǵany anyqtaldy. Qalǵan memlekettik aýdit organdary boiynsha kerisinshe qarajattyń tiimsiz paidalanylýynyń tómendegeni baiqalady», - dedi E. Jamaýbaev Úkimet pen Esep komitetiniń 2020 jylǵa arnalǵan respýblikalyq biýdjettiń atqarylýy týraly esepterin qaraý kezinde.
Onyń aitýynsha, Esep komiteti belgilegen ereje buzýshylyq faktileri 32 paiyzǵa, al ishki memlekettik aýdit organdary boiynsha 3 esege tómendedi.
«Bul aýditti tsifrlandyrýdyń, kameraldyq baqylaýǵa kóshýdiń jáne qarajatty tiimsiz paidalaný faktilerin boldyrmaý ári jol bermeý jónindegi aldyn alý sharalarynyń nátijesi bolyp otyr. Biýdjet shyǵystarynyń tiimdiligin arttyrý máselesi Úkimettiń turaqty baqylaýynda ekenin taǵy da atap ótkim keledi», - dedi ministr.
