Jergilikti atqarýshy organdar jas dárigerlerdi áleýmettik qoldaý is-sharalaryn laiyqty deńgeide qabyldamai otyr. Bul týraly Úkimet otyrysynda QR Densaýlyq saqtaý ministri Aleksei Tsoi aitty, dep habarlaidy QazAqparat.
«2020 jyly jumysqa ornalasqan 1 683 túlektiń tek 25 paiyzy, onyń ishinde aýyldyq jerlerde 37 paiyzy ǵana áleýmettik qoldaý is-sharalarymen qamtylǵan. Bul rette túlekterdi áleýmettik qoldaý is-sharalarymen qamtýdyń joǵary kórsetkishi Qostanai oblysynda - 81, Soltústik Qazaqstan oblysynda – 70, Atyraý oblysynda – 57, Batys Qazaqstan oblysynda 51 paiyz bolsa, tómen qamtý Almaty oblysynda – 13, Aqtóbe oblysynda – 12 jáne Túrkistan oblysynda 7 paiyz ǵana», - dedi ministr.
Onyń aitýynsha, aýyldyq jerlerge barǵan jas dárigerlerdi áleýmettik qoldaýmen eń tómen qamtý 5 oblysta tirkelgen. Naqty aitqanda, aýylǵa barǵan mamandardyń Túrkistan oblysynda – 8, Almaty oblysynda – 9, Pavlodar oblysynda – 14, Mańǵystaý oblysynda – 29 jáne Shyǵys Qazaqstan oblysynda 35 paiyzy áleýmettik qoldaýmen qamtylǵan.
«Osylaisha, jergilikti atqarýshy organdar áleýmettik kepildendirýdi qamtamasyz etý jáne jergilikti jerlerge kadrlardy bekitý boiynsha is-sharalardy laiyqty deńgeide qabyldamai otyr», - dedi Aleksei Tsoi.
