Jer kodeksiniń 108, 109-babyna «Respýblikalyq mańyzy bar qala mańyndaǵy kez kelgen jerdi tabystaý, jerdiń nysanaly maqsatyn aýystyrý týraly sheshimderi iri qalalardyń ákimdiginiń ózara kelisimimen júzege asyrylýy tiis» degen normany engizý kerek. Bul týraly QR Aýyl sharýashylyǵy ministrligi jer reformasy komissiiasynyń otyrysynda zańger Baqytjan Bazarbek aitty, dep habarlaidy QazAqparat.
«Bizdiń elde qala mańyndaǵy aýmaqtarǵa qatysty qabyldanǵan qaýlylar is júzinde jumys istemeidi. Nur-Sultan, Almaty, Shymkent siiaqty úlken qalalar mańyndaǵy ákimdikterde jerdi berý, jerdiń nysanaly maqsatyn aýystyrýǵa qatysty sybailas jemqorlyqtyń dárejesi sharyqtap ketken. Sondyqtan Jer kodeksiniń 108, 109-babyna «Respýblikalyq mańyzy bar qala mańyndaǵy kez kelgen jerdi tabystaý, jerdiń nysanaly maqsatyn aýystyrý týraly sheshimderi iri qalalardyń ákimdiginiń ózara kelisimimen júzege asyrylýy tiis» degen normany engizý kerek. Sonda ǵana osyndai máseleniń aldyn alamyz», - deidi «Bazarbek&Partners» zań kompaniiasynyń bas direktory Bazarbek Jumabekuly.
Sondai-aq, ol jerge ornalastyrý jumysynyń sapasy syn kótermeitinin aitty.
«Jerge ornalastyrýshylar óte úlken qatelikke boi aldyryp otyr. Bul jerde sot sheshimimen jeriniń bir bóliginen aiyrylǵan qarapaiym azamat, zańdy tulǵalar zardap shegedi. Jer komissiiasynyń jumysy aiasynda jerge ornalastyrý jumysyn litsenziialaý jáne jerge ornalastyrý jumysyn qaita attestatsiialaý siiaqty usynysty sheshýimiz kerek. Qazirgi tańda jerge ornalastyrýǵa qatysty mamandyq ta, tájiribe de joq. Bul salada esh tájiribesi joq mamandar jumys isteýde. Osy olqylyqtyń ornyn toltyrýymyz kerek», - deidi ol.
