Nur-Sultan qalasynyń TJD apat qaýpin azaitý men azamattyq qorǵanys salasyn baqylaý basqarmasynyń bastyǵy Erkin Otarǵalymuly elordalyqtarǵa peshtiń murjasy men qudyǵyn tekserip, tazalap qoiýdy eskertti, dep habarlaidy QazAqparat.
«Kóp jaǵdaida pesh – órttiń shyǵýyna sebepshi bolyp jatady. Jalpy órt qaýipsizdigi talaptaryna sáikes úidegi peshterge qoiylatyn birqatar norma men talap bar. Olardyń birinshisi ári eń negizgisi – tóbe jabyndysynan óterde peshtiń murjasy janyp ketýi múmkin materialdarǵa timei ornalastyrylýy kerek. Iaǵni murjanyń órtke qarsy aralyǵy qarastyrylǵan. Bul aralyq – kem degende 38 santimetr bolýy tiis. Ózderińiz biletindei, peshti salynǵanda tóbe jabyndylarynan murjasyn ótkizer kezde ol kirpishpen qorshala turǵyzylady. Ekinshiden eger úidiń qabyrǵasy janǵysh materialdardan, shpaldardan salynsa, onda peshterdiń osy janýy ońai qabyrǵalarǵa deiingi araqashyqtyǵy saqtalýy tiis. Bul endi peshti salý kezinde eskeretin máseleler», - dedi Erkin Otarǵalymuly elorda ákimdigindegi onlain brifing barysynda.
Onyń aitýynsha aýa raiy kúrt sýyǵan kezde peshti keibir úiler shamasynan tys qyzdyryp jatady. Osy rette montajdaý kezinde kemshilikke jol berilse ol úiden órt shyǵý qaýpi óte joǵary.
«Ekinshi másele – qysta biz peshtiń mańaiyna, ústine kiim jaiamyz, aiaq kiim keptiremiz. Peshti jaqqan kezde keibirimiz otty tez tutatatyn suiyqty paidalanymyz. Bul órt qaýipsizdigi talaptaryna qaishy keletinin taǵy da eskertkim keledi. Taǵy da bir másele – peshterdi baqylaýdy kishkentai balalarǵa tapsyrý. Ol da burys úrdis. Óitkeni janyp jatqan pesh – qaýiptiliktiń joǵarǵy nysany ekenin esterińizge salamyz», - dedi ol.
Erkin Otarǵalymuly qazir kún sýyta bastaǵandyqtan peshtiń murjasy men qudyǵyn tekserip, ystan tazalap alý kerektigin eskertti.
«Kún sýyta bastaǵanda ókinishke qarai keide adamdarǵa ys tiiý faktisi tirkelýi múmkin. Sol sebepti peshti tekserip, sańylaýy bolsa bitep, aqtap qoiǵan abzal. Jylytý maýsymynda kem degende osy tekserý jumysyn júrgizip alý artyq bolmaidy», - dedi ol.
