Kórneki foto: pexels.com
Tsifrlyq damý, innovatsiialar jáne aeroǵarysh ónerkásibi vitse-ministri Ashat Orazbek Almatyda jer silkinip jatqanda bailanys operatorlary turǵyndarǵa SMS-habarlamany nege tym kesh jibergenin túsindirdi, dep habarlaidy Sputnik Qazaqstan.
Onyń aitýynsha, azamattyq qorǵaý týraly zańǵa sáikes, operatorlar tótenshe jaǵdailar kezinde jappai SMS-habarlama jiberýge mindetti. Olar bul talapty oryndap ta jatyr, biraq problema – tehnologiiada.
"SMS-habarlama aitarlyqtai baiaý jetedi. TJ rejiminde azamattardy jedel qulaqtandyrý nemese qaida barý kerek ekeni týraly aqparat usyný múmkin emes", - deidi Orazbek Májilis kýlýarynda.
Dese de azamattarǵa TJ týraly lezde habarlaýǵa múmkindik beretin tehnologiia bar.
"Tehnologiia bar. Qandai qosymshany qoldansańyz da, ekran betine shyǵatyn jedel habarlama bolady. Eger telefon qosýly bolsa, siz osyndai habarlamany alasyz. Mundai sheshim Qazaqstanda da bar. Bailanys operatorlary ázirlegen. TJ ministrligimen birlesip synaqtan da ótkizildi", - dep atap ótti Orazbek.
Aitýynsha, jedel habarlamalardy iske qosý úshin qarjylandyrý qajet.
"Biz azamattyq qorǵaý týraly zańǵa osy sheshimdi qoldanýǵa múmkindik beretin normany engizýdi josparlap otyrmyz. Biraq memleket tarapynan qarjylandyrý qajet", - dedi vitse-ministr.
Alaida ol naqty qansha aqsha qajet ekenin aita almady.
TJ kezinde SMS-habarlamany baiaý jibergeni úshin bailanys operatorlaryna aiyppul salý kózdelmegen.
Esterińizge sala keteiik, 23 qańtar kúni 00 saǵat 09 minýtta Almatyda jer silkindi. Jer silkinisi Almatyda 5 ball deńgeiinde sezilgen. Turǵyndar úreilenip, úilerin tastap, dalaǵa shyǵyp ketken.
Jer silkinisi týraly eskertý habarlama almatylyqtarǵa tym kesh, eki-úsh saǵattan soń kelgen.
