Jer reformasy jónindegi komissiianyń birinshi otyrysynda qoǵam qairatkeri Muhtar Taijan aýyldaǵy jaiylym jáne shabynldyq jerler boiynsha problemany aitty, dep habarlaidy QazAqparat.
«Jer kadastry ashyq bolýy kerek. Jer kimniń qolynda, kim igerip jatyr, kim paidalanyp otyr? Mundai aqparat halyqtyń barshasyna aiqyn bolǵany jón. Meniń keibir qarsylastarym bul talap jeke málimet týraly zańnamaǵa qaishy ekenin alǵa tartyp otyr. Olai emes, sebebi jerdiń aýyl sharýashylyǵyna arnalǵan 99 paiyzy memlekettiń menshigi. Sondyqtan bul turǵyda eshqandai jeke málimet týraly zańǵa qaishy emes», - dep toqtaldy Taijan.
Sonymen qatar ol halyqtyń jartysy aýylda turyp jatqanyn, bul eldi mekenderde jaiylym ári shabyndyq, egistik jer tapshy ekenin, bul alqaptar bir qolda shoǵyrlanǵanyn aitty.
«Burynǵy pai júiesin paidalanyp, quityrqy jolmen aýyl turǵyndaryn jersiz qaldyrdy. Qazir memleket, Úkimet osy qatelikti túzetý kerek dep esepteimin. Sondyqtan aýyldyń mańaiyndaǵy jerge qatysty birjaqty kelisimsharttardy úzildi-kesildi merziminen buryn buzýymyz kerek. Ár aýyldyń aýmaǵynda jerler osy eldi meken turǵyndaryna tiesili bolýy tiis, iaǵni qoǵamdyq jaiylym, qoǵamdyq egistik, qoǵamdyq shabyndyq degen qalyptasqany jón», - dedi qoǵam qairatkeri.
