Foto: Iu. Kim, jambylinfo
Biyl Jeńistiń 80 jyldyǵyn merekeleý qurmetine 109 ardagerge jalpy somasy 545 mln teńgege birjolǵy materialdyq kómek tólendi. Bul týraly Ortalyq kommýnikatsiialar qyzmetinde ótken baspasóz máslihatynda aityldy dep habarlaidy Ult.kz.
UOS-da Jeńiske úles qosqan ózge de sanattardaǵy azamattarǵa da 50-den 200 myń teńgege deiingi mólsherde áleýmettik kómek kórsetildi.
QR Eńbek jáne halyqty áleýmettik qorǵaý vitse-ministri Oljas Anafin búgingi kúni ardagerlerge áleýmettik qoldaý sharalary ortalyq jáne jergilikti deńgeide júzege asyrylatynyn aitty.
"Birinshiden, zeinetaqy jáne ózge de áleýmettik tólemderdiń mólsheri jyl saiyn artyp keledi. 2025 jylǵy 1 qańtardan bastap tólem mólsheri bazalyq zeinetaqy boiynsha 6,5% - ǵa jáne yntymaqty zeinetaqy boiynsha 8,5% - ǵa ósti. Qabyldanǵan sharalar halyqaralyq tájiribede usynylatyn tabysty zeinetaqy tólemderimen almastyrý koeffitsientin (40%) oryndaýǵa múmkindik berdi, bul kórsetkish Qazaqstan Respýblikasynda 54,8%-dy qurady. Basqa áleýmettik tólemderge qaramastan azamattardyń 19 sanatyna arnaýly memlekettik járdemaqy tólemi júzege asyrylady, onyń negizgi alýshylary egde jastaǵy azamattar bolyp tabylady (soǵysqa qatysýshylar, tyl eńbekkerleri, aqtalǵan azamattar jáne t.b.). Nátijesinde, 2025 jylǵy 1 mamyrǵa Uly Otan soǵysynyń ardagerleri alatyn áleýmettik tólemderdiń jiyntyq mólsheri 271 myń teńgeni, Uly Otan soǵysy ýaqytyndaǵy tyl eńbekkerleriniń jiyntyq mólsheri 179 myń teńgeni qurady", -dep otyr ol.
Sonymen qatar vitse-ministrdiń sózinshe barlyq ardagerlerge salyq salýda jeńildikter qarastyrylǵan, Astana jáne Almaty qalalaryndaǵy mamandandyrylǵan gospitaldarda bilikti meditsinalyq kómek kórsetiledi.
Sondai-aq, jergilikti atqarýshy organdar jergilikti biýdjet jáne demeýshilik qarajat esebinen ardagerlerge mereke nemese ataýly kúnderge birjolǵy áleýmettik kómek, turǵyn úi jóndeýge, otynmen qamtamasyz etýge, kommýnaldyq qyzmetterdiń tólemine kómek jáne qoǵamdyq kólikte júrýge jeńildikter túrinde qosymsha qoldaý sharalaryn kórsetedi.
Áleýmettik kómek kórsetýdiń eseligi árbir óńirde jergilikti ókildi organdardyń (máslihattardyń) sheshimi boiynsha biýdjet múmkindikterine qarai jeke belgilenedi eken.
"Jeńistiń 80 jyldyǵyn merekeleý qurmetine jergilikti atqarýshy organdar UOS ardagerlerine búkil el boiynsha birjolǵy áleýmettik kómekti 5 mln teńge kólemindegi biryńǵai mólsherde kórsetti", -dep otyr Oljas Anafin.
