Prezident Joldaýy elimizdegi jańa ózgeristerdiń bastaýyna negiz boldy. Mundai pikirdi «Qazaqkontsert» memlekettik kontserttik uiymynyń direktory, Qazaqstannyń eńbek sińirgen qairatkeri Jeńis Seidýllauly bildirdi, dep habarlaidy QazAqparat.
«1 qyrkúiek kúni jariialanǵan Prezidenttiń jyl saiynǵy Joldaýy elimizdegi jańa ózgeristerdiń bastaýyna negiz boldy. Táýelsizdiktiń 30 jyldyǵy qarsańynda jariialanǵan «Halyq birligi jáne júieli reformalar – el órkendeýiniń berik negizi» Joldaýy elimizdiń damý strategiiasyn aiqyndap berdi. Memleket basshysy koronavirýs pandemiiasyn jáne sonyń saldarynan bolǵan ekonomikalyq daǵdarysty eńserýdiń naqty josparyn usyndy. Joldaýda kópshilikti tolǵandyryp júrgen suraqtar kóterilip, ashyq talqylandy. Biylǵy Joldaýda halyqtyń ómir súrý sapasyn jaqsartýǵa basa mán berilgen. Ásirese Memleket basshysynyń eldegi eń tómengi jalaqyny 60 myń teńgege deiin ulǵaitý týraly bastamasy qoǵam tarapynan keń qoldaý tapty. Sondai-aq «Qazaqkontsert» ujymyn «Mádeniet qyzmetkerleri, qoryqshylar, kitaphanashylar, kólik júrgizýshilerdiń jalaqysy 2022-2025 jyldary aralyǵynda jyl saiyn 20 paiyzǵa arttyrý tapsyrylady», degen bastama erekshe qýantty», - dedi ol.
«Qazaqkontsert» direktorynyń atap ótýinshe, mádeniet salasyna kórsetilgen bul qoldaý onyń jańa qarqynmen damýyna yqpal etetin bolady.
«Bul bastamany júzege asyrý óte mańyzdy dep sanaimyn. Sebebi onyń igiligin 600 myń otandasymyz kóredi eken. Jańa Joldaýda Qasym-Jomart Kemeluly búgingi damýymyzdyń osal tustaryn da atap kórsetti. Sondyqtan elimizdiń árbir sanaly azamaty úshin bul Joldaý óte mańyzdy dep bilemin. Onyń tolyǵymen júzege asýy, jaqsy nátije kórsetýi tek Úkimetke qana emes, halyqtyń belsendiligine de bailanysty. Barlyq igi bastamalar men mindetterdi júzege asyrý úshin bilik pen qoǵam birlese eńbek etýi qajet. Mańyzdy ári izgi isterge bastaityn bul Joldaý elimizdegi turaqtylyqty saqtai otyryp, halyqtyń ál-aýqatyn jaqsartýǵa zor úles qosatyny anyq», - dedi Jeńis Seidýllauly.
