Jyl basynan beri Túrkistan oblysynda paraqorlyq árekettiń aldyn alyp, quzyrly mekemege der kezinde habarlaǵan 8 azamatqa 1,5 mln teńge kóleminde yntalandyrý syiaqysy berildi.
Bul týraly QR Sybailas jemqorlyqqa qarsy is-qimyl agenttiginiń Túrkistan oblysy boiynsha departament basshysy Hákim Kóshqaliev málim etti, dep habarlaidy QazAqparat.
«Túrkistan oblysy respýblikadaǵy iri oblystardyń biri. Halqynyń sany 2 mln-nan asady. Oblystyń quramyna 3 qala, 14 aýdan kiredi. Jemqorlyqty boldyrmaýda onyń aldyn alý óte mańyzdy. Osy oraida biyl jyl basynan beri 870 myńnan astam adamdy qamtyǵan 675 sybailas jemqorlyqtyń aldyn alý sharasy uiymdastyryldy. Sonymen qatar 264 kezdesý ótkizilip, 333 tikelei efirden jemqorlyq máselesi talqylandy. Sol siiaqty paraqorlyqtan aýlaq bolýǵa shaqyratyn 9 beinerolik túsirilip, ol halyqqa nasihattaldy. Halyqpen tyǵyz bailanystyń biri BAQ, osy oraida «Túrkistan» telearnasynda «Halyq úni» atty telebaǵdarlamasy ashyldy», - dedi Hákim Kóshqaliev Antikor Live jobasynyń tikelei efirinde.
Onyń aitýynsha, sybailas jemqorlyqtyń aldyn alýda óńir azamattary belsendi.
«Biyl paraqorlyq áreket týraly habarlaǵan 8 tulǵaǵa 1,5 mln teńgeniń syiaqysy berildi. Árine, biz mundai qoǵam belsendilerin qoldaimyz. Jalpy jyl sanap Túrkistan oblysynda jemqorlyq áreketine bei-jai qaramaityn belsendi azamattardyń sany artyp keledi. Sonymen qatar bizde Call ortalyq jumys isteidi, biyl ortalyqqa 71 adam habarlasty. Belsendi azamattardyń habary men bizdiń mamandardyń jedel áreketiniń negizinde 3 tulǵanyń zańsyz áreketi úshin qylmystyq is qozǵaldy jáne 2 laýazymdy tulǵa jaýapqa tartyldy. Osy oraida janashyr azamattardyń arqasynda bul baǵyttaǵy jumys óz deńgeiinde atqarylyp jatyr dep oilaimyn», - deidi ol.
