Atyraý oblysynda aýrýhana direktory sottalyp, aýyl ákimi úiqamaqqa alyndy, dep habarlaidy QazAqparat.
Sybailas jemqorlyqqa qarsy is-qimyl agenttigi Atyraý oblysy boiynsha departamenti basshysynyń birinshi orynbasary Aidos Mamyttyń aitýynsha, Qurmanǵazy aýdandyq ortalyq aýrýhanasynyń burynǵy direktoryna qatysty sot otyrysyna áriptesteri qatysqan.
«Biyl departamenttiń bastamasymen Atyraý sottarynda memlekettik qyzmetshiler arasynda sybailas jemqorlyqtyń aldyn alýdyń jańa tásili qoldanyla bastady. Máselen, jaqynda Qurmanǵazy aýdandyq ortalyq aýrýhanasynyń burynǵy direktoryna áriptesteriniń qatysýymen úkim shyǵaryldy. Endi sybailas jemqorlyq baptary boiynsha úkim sottalýshynyń eńbek etken ujymynyń qatysýymen jariialanady» - deidi Aidos Mamyt.
Onyń aitýynsha, sottalýshy QR Qylmystyq Kodeksiniń 361-babynyń 1-bóliginde, 189-babynyń 3-bóliginiń 2-tarmaǵynda kózdelgen qylmysty jasaǵany úshin kináli dep tanylǵan.
Oǵan 1 jyl bas bostandyǵyn shekteý túrindegi jaza taǵaiyndaldy.
Memlekettik organdar men kvazimemlekettik uiymdarda laýazymdardy atqarý quqyǵynan ómir boiyna aiyryldy.
«Qurmanǵazy aýdanyndaǵy bir aýyldyq okrýgtiń ákiminiń ústinen qylmystyq is qozǵaldy. Aýyldyq okrýg ákimine qatysty memlekettik satyp alýda artyqshylyq kórsetkeni úshin jeke kásipkerlik ókilinen para alý deregimen qylmystyq is tergelýde. Qazir kúdiktige úi qamaqqa alý túrindegi bultartpaý sharasy sanktsiialandy» -dep málim etti Aidos Mamyt.
