Aqtóbe qalasy ákiminiń orynbasary Jangeldi Áýbákirov pen qalalyq turǵyn úi-kommýnaldyq sharýashylyq bólimi basshysynyń mindetin atqarýshy Nurlan Dosovqa qatysty sot úkimi ózgerdi. Olar jazasyn bostandyqta júrip óteidi, dep habarlaidy QazAqparat.
Aqtóbe qalasy ákiminiń orynbasary Jangeldi Áýbákirov, qalalyq turǵyn úi – kommýnaldyq sharýashylyq bólimi basshysynyń mindetin atqarýshy Nurlan Dosov, merdiger mekeme basshysy S.Janasbaev, bas esepshi D.Dúisembi, jeke kásipker N.Mustafinge qatysty qylmystyq is qaralyp, olar 5 jyldan 7 jylǵa deiin bas bostandyǵynan aiyrylǵan bolatyn.
Keiin is Aqtóbe oblystyq sotynyń qylmystyq ister jónindegi sot alqasynda qaralyp, sot úkimi ózgertildi, sottalǵandardyń is-áreketteri qaita saralandy.
Is materialyna súiensek, Aqtóbe qalasy ákiminiń orynbasary Jangeldi Áýbákirov 2019 jyly qalalyq turǵyn úi - kommýnaldyq sharýashylyq bólimi basshysynyń mindetin atqarýshy Nurlan Dosovty «KDS-Astana» JShS-men kelisimshartqa otyrýǵa, jańa jyldyq bezendirý úshin 100 mln teńge aqsha aýdarýǵa kóndirgen. Dosov biýdjet qarajatynan seriktestiktiń esepshotyna 30 mln teńge aýdardy. Sodan keiin oryndalǵan jumystar aktisine qol qoidy, taǵy 70 mln teńgeni berdi. Bul rette jańa jyldyq áshekeilerdi jetkizý júzege asyrylmady. Prokýror birinshi satydaǵy sottyń úkimin ózgerissiz qaldyrýdy surady. Sottalǵandar men olardyń qorǵaýshy advokattary úkimniń kúshin joiýdy jáne sottalǵandardy aqtaýdy surady.
«Qylmystyq kodekstiń 361-baby 4-bóliginiń sanktsiialary 7 jylǵa deiingi merzimge bas bostandyǵyn shekteý ne sol merzimge bas bostandyǵynan aiyrý túrindegi balama jazany kózdeidi. Alqa qylmystyq jaýaptylyq pen jazany jeńildetetin mán-jailardy, atap aitqanda, kináni moiyndaýy, olardyń árqaisysynyń kámelet jasqa tolmaǵan balasynyń bar ekeni, alǵash ret qylmystyq jaýapqa tartylǵany, jumys orny men turǵylyqty jeri boiynsha jaqsy minezdemesi nazarǵa alynyp, Jangeldi Áýbákirov pen Nurlan Dosovqa 4 jyl merzimge bas bostandyǵyn shekteý túrindegi jaza,
S.Janasbaev, D.Dúisembi, N.Mustafinniń árqaisysyna 3 jyl merzimge bas bostandyǵyn shekteý túrindegi jaza taǵaiyndaldy. Barlyq sottalǵandar ómir boiy memlekettik qyzmette jumys isteý quqyǵynan aiyryldy. Apelliatsiialyq qaýly zańdy kúshine engen joq», - dep habarlady oblystyq sottyń baspasóz qyzmeti.
