Jeltoqsanda otandyq munai óńdeý zaýyttary 56 myń tonna áýe kerosinin óndiredi. Bul jaiynda Májilis depýtattarynyń saýalyna QR Premer-Ministriniń orynbasary Roman Skliardiń jaýabynda aitylǵan, dep habarlaidy QazAqparat.
«Ishki naryqty avia otynmen qamtamasyz etý úshin osy jyldyń qazan aiynda múddeli memlekettik organdardyń, resýrs ustaýshylardyń, sondai-aq aviakompaniialar/áýejailar ókilderiniń, otyn importtaýshylardyń qatysýymen keńes ótkizildi. Onyń qorytyndysy boiynsha aviakompaniialar men áýejailarǵa aviatsiialyq otyndy basymdyqpen jóneltý týraly sheshim qabyldandy. Birjalyq baǵalarǵa qatysty qazirgi kezde bir saýda sessiiasy kezinde bazalyq deńgeiden 2 paiyzǵa kóterilý shekteýlerine bailanysty birjadaǵy baǵalar naryqtyq koniýnktýrany kórsetpeitinin atap ótemiz», - delingen Úkimet basshysy orynbasarynyń jaýabynda.
Onyń atap ótýinshe, shildeden qazanǵa deiingi saýda-sattyq kezeńinde baǵa 1 tonnasyna 200 myń teńgeden 256 myń tonnaǵa deiin ósti. Alaida osy jylǵy 8 qarashada Birjalyq komitettiń sheshimimen baǵa 1 tonnasyna 220 myń teńgege deiin tómendetildi.
«Biyl qarashada ortasha ailyq tutyný osy jyldyń 10 ai úshin 53,4 myń tonna bolǵan kezde kerosin óndirisiniń kólemi shamamen 46 myń tonnany jáne jeltoqsanda 56 myń tonnany quraidy. Aldyn ala aqparat boiynsha, «Nursultan Nazarbaev halyqaralyq áýejaiy» AQ Orsk MÓZ-i óndirgen 10 myń tonnaǵa jýyq aviakerosinge qol jetkizdi. Sondai-aq «QazMunaiGaz» UK» AQ qarasha-jeltoqsan ailarynda áýejailarǵa 15-20 myń tonna kóleminde avia otyndy importtaýǵa járdem berýde. Búgingi kúni barlyq MÓZ-der táýlik saiyn aviatsiialyq otyn óndiredi jáne ishki naryqqa ýaqtyly jónelte otyryp, shtattyq rejimde jumys isteýde», - dedi Roman Skliar.
