Túrkistan oblysynyń politsiiasy áleýmettik jelide taraǵan " Shornaq aýylynda ózbek ultynyń ókilderi ýchaskelik politsiiaǵa shabýyl jasady" degen aqparatty joqqa shyǵardy, dep habarlaidy "Ult aqparat".
Polisia.kz portalynyń málimetinshe, Shornaq eldi mekenindegi turmystyq janjaldy arandatýshylar óz paidasyna jaratyp, tártipsizdik uiymdastyrýdy kózdep otyr.
Politsiia arandatýshylar quqyqbuzýshylyqqa úndeitin negizsiz jáne eski videolardy taratyp jatqanyn habarlady.
"Politsiia áleýmettik jelilerge monitoring jasap, arandatýshylyq belgilerin anyqtap jatyr. Osy ýaqytqa deiin eldi dúrliktirýge baǵyttalǵan jalǵan aqparat taratýshy alty adam anyqtaldy", - delingen aqparatta.
Aita keteiik, buǵan deiin áleýmettik jelide Shornaq aýylynda turǵyndar arasynda janjal shyqqany jaily birneshe video taraǵan bolatyn.
Túrkistan oblysynyń politsiia departamenti "ózbek ultynyń ókilderi Shornaq aýylyndaǵy ýchaskelik politseige shabýyl jasady" degen aqparattyń jalǵan ekenin jáne shyndyqqa janaspaitynyn resmi túrde málimdedi. Osyndai aqparat taratýshylarǵa zańǵa sáikes qylmystyq jaýapkershilik qarastyrylǵanyn eskertti.
Túrkistandaǵy turmystyq janjal
Túrkistan oblysynyń Shornaq aýylynda turmystyq janjal boldy. Buzaqylar aýyl turǵynynyń úiine tas atqan. Sonyń saldarynan ýchaskelik politsiia men úsh turǵyn jaraqat aldy. Olarǵa oqiǵa ornynda meditsinalyq kómek kórsetildi.
"Oqiǵa ornyna dereý jetken politsiia ýchaskelik inspektory zańbuzýshylyqtyń jolyn kesti. Bir top adam qarsylyq tanytyp, tártipke baǵynbasa da, politsiia qyzmetkeri alǵan jaraqatyna qaramastan basbuzarlardyń qarý qoldanýyna jáne qol jumsaýyna jol bergen joq", - dep habarlady politsiia.
Jedel izdestirý sharalary barysynda janjalǵa qatysy bar tórt adam anyqtalyp, ustaldy. Eki taraptan eki adam sot sheshimimen qamaýǵa alyndy. Qazirgi kezde janjaldyń neden shyqqany tekserilip jatyr. Buzaqylyq faktisi boiynsha tergeý amaldary júrgizilýde, dep tolyqtyrdy quqyq qorǵaý organy.
Politsiianyń aqparatyna sáikes, janjal bolǵan kúnniń erteńine arandatýshylar jaqyn mańdaǵy aýyl turǵyndaryn shaqyryp, buzaqylyq jasaýǵa úndegen. Politsiia qyzmetkerleri bul zańsyz áreketterdiń jolyn kesti. Aýyl turǵyndary men jergilikti ákimshilik ókilderi jáne oblystyń qoǵam belsendileri kezdesti.
Qazir aýyldaǵy jaǵdai qalypqa tústi. Eldi mekendegi tártipti qamtamasyz etý úshin politsiia qyzmetkerleriniń jumysy kúsheitildi.
