Áleýmettik jeliler men messendjerlerde taǵy bir feik tarady, dep habarlaidy "Ult aqparat" Stopfake.kz saityna silteme jasap.
Orys tilindegi habarlamada oqýshylardyń ata-anasyna diaskin-test jasaýǵa jáne tumaýǵa qarsy ekpe salýǵa arnalǵan kelisim blankisi beriletini týraly aitylǵan. Oǵan qol qoisa, balalarǵa koronavirýsqa qarsy vaktsina egiledi.
"Saq bolyńyzdar. Mektepte diaskin test jasaýǵa jáne tumaýǵa qarsy ekpe salýǵa arnalǵan kelisimdi bir blankpen beredi. Diaskinge kelisim bere otyryp, tumaýǵa qarsy ekpege de ruqsat beresizder. Másele mynada, búgin Mantýrov bir jańalyq aitty. Qazirgi kezde tumaý men koronavirýsqa qarsy jańa vaktsina ázirlenip jatyr. Ol bir flakonda bolady eken", - delingen habarlamada.
Densaýlyq saqtaý ministrligi bul aqparatty joqqa shyǵardy. Sanitarlyq-epidemiologiialyq baqylaý komitetiniń resmi ókili Erjan Baitanaev diaskin test pen tumaýǵa qarsy vaktsina eki bólek shara ekenin aitty.
"Diaskin test – bul adamnyń týberkýlezben aýyratyndyǵyn anyqtaityn naqty test. Ol barlyq balaǵa birdei jasalmaidy. Ony Mantý synamasy oń nátije bergen mektep oqýshylaryna ǵana jasaidy. Sosyn diaskin test mektepterde emes, týberkýlez dispanserlerinde jáne tek ata-analardyń kelisimimen ǵana jasalady. Tumaýǵa qarsy vaktsinalaý da mektepte júrgizilmeidi", – dedi Baitanaev.
Osy oraida komitettiń resmi ókili Qazaqstanda ǵana emes, jalpy álem boiynsha bir ýaqytta tumaýdan da, KVI-den de qorǵaityn polivaktsinalar joq ekenin habarlady.
