Jelide Almatyda otyz tórt mektepke "mina qoiǵan" jalǵan terroristiń haty paida boldy, dep habarlaidy "Eýraziia birinshi arnasy".
Jalǵan terrorist hatty 19 naýryzǵa qaraǵan túni Almatydaǵy 34 mekteptiń basshylaryna joldaǵan. Qaskói ózin Aziz Safarov tobynyń jetekshisi retinde tanystyrdy:
"Sálemetsiz be, meniń atym Aziz Safarov. Biraq qazir bul jaily emes, sizdiń oqý mekemeńizge jarylǵysh zat qoiyldy, ol 15.00-de iske qosylady. Balalardyń ómirin qutqarǵyńyz kele me? Marhabat!".
Ol telefon balansyna 500 myń jiberýdi talap etken. Alaida aqshany qandai valiýtada salý kerek ekenin naqtylamapty.
"Eger meniń talaptarym oryndalmasa, mekteptiń kúli kókke ushady, al búldirshinderdiń máiiti úiindi astynda jatady. Ýaqyt shekteýli, bári sizderdiń qoldaryńyzda", - degen jalǵan terrorist.
Quqyq qorǵaý organdary kúdiktini áli ustaǵan joq.
"Lańkestiń" telegram kanaly biyl 9 naýryzda ashylǵan. Onda 16 naýryzda avtormen bailanysý úshin silteme kórsetilgen bir ǵana post jariialanǵan. Elektrondy poshtada "terrorist" degen sóz bar.
Negizgi Telegram-kanalynda da "20.03.2021" habarlamasymen tek bir ǵana jazba tur.
Oqiǵanyń mán-jaiyn bilý úshin tilshimiz Almatynyń politsiia departamentine habarlasty. Baspasóz qyzmeti qylmysker áli izdestirilip jatqanyn atap ótti, dep jazady Sputnik Qazaqstan.
"Jedel izdestirý sharalarynyń basqa mán-jaiy jariia etilmeidi", - dep málimdedi departamenttegiler.
19 naýryz tańerteń belgisiz bireýdiń Almatyda 12 mektepke mina qoiǵany habarlandy. Keiinirek mektepter sany otyz tórtke jetti. Almaty politsiiasynyń saperleri barlyq oqý ornyn teksere bastady. Balalar qaýipsiz jerge evakýatsiialandy.
Alaida mektepterden jarylǵysh zat tabylǵan joq. Kúdiktini izdeý jumystary jalǵasyp jatyr.
