Oqý-aǵartý ministrligine balabaqshalardyń jumysyna qatysty ondaǵan aryz-shaǵym túsip jatyr, dep habarlaidy "Ult aqparat" vedomstvonyń baspasóz qyzmetine silteme jasap.
"Ótinishterdiń arasynda balalardy ustaý jaǵdailary, sondai-aq qyzmetkerlerdiń jumysy men balalardyń densaýlyǵy men ómirine ziian keltirý týraly shaǵymdar bar.
Sońǵy túsken aryz-shaǵymdar boiynsha tekserý jumystary júrgizilip, balalardyń ómiri men densaýlyǵyna ziian keltirý faktileri boiynsha 5 ákimshilik is qozǵaldy. Sondai-aq, Ishki ister ministrligi mektepke deiingi uiymdarǵa qatysty 15 ákimshilik is qozǵady" - delingen habarlamada.
Ministrlik málimetinshe, rezonans týdyrǵan oqiǵalardyń biri - Nur-Sultan qalasyndaǵy «Sáti» jekemenshik balabaqshasynda búldirshinderge qatysty teris qylyq faktileri tirkelgen oqiǵa. Onda balabaqsha qyzmetkerleri balalardy edenge súirep, buryshqa turǵyzyp, edenge iterip, jylaýyn toqtatýǵa májbúrlegen.
Al Atyraý qalasyndaǵy jekemenshik mektepke deiingi mekemede toptaǵy balalardyń kóp bolýyna bailanysty tárbieshi balalarǵa durys baqylaý júrgizbegen. Sonyń saldarynan balabaqshanyń úsh tárbielenýshisi 2019 jyly týǵan qyzdy uryp-soǵyp, jaraqattaǵan.
Qyzylordada jekemenshik balabaqshalardyń biriniń júrgizýshisi mekemege 7 balany alyp kelgen. Balalardy balabaqshaǵa kirgizgen tárbieshiniń kómekshisi bir balanyń kóshede qalyp qoiǵanyn baiqamai qalǵan. Júrgizýshi de balaǵa mán bermei, balany qaǵyp ketken. Saldarynan bala aýrýhanaǵa bara jatqan jolda kóz jumdy. Osy fakti boiynsha qylmystyq is qozǵaldy.
"Temirtaýda qyzdyń betin kórpemen jaýyp, balany tunshyqtyrmaq bolǵan muǵalimge qatysty úkim shyqty. Sot tárbieshini Qazaqstan Respýblikasy Qylmystyq kodeksiniń 140-babynyń 2-bóligimen kináli dep tanyp, oǵan 3 jyl merzimge kámeletke tolmaǵandarmen jumys isteýge bailanysty laýazymdardy atqarý quqyǵynan aiyra otyryp, 120 saǵat qoǵamdyq jumystarǵa tartý túrindegi jaza taǵaiyndady.
Aqtóbe qalasyndaǵy «Botaqan» jeke balabaqshasynyń 4 jasar tárbielenýshisi kúndiz baspaldaqtan qulaý saldarynan tamaq aimaǵynan (iek asty) dene jaraqatyn aldy. Oqiǵa týraly ata-anasyna eshkim aitpaǵan, ata-ana oqiǵa týraly keshki ýaqytta ǵana biledi. Balabaqsha ákimshiligi balaǵa alǵashqy meditsinalyq kómek kórsetpegen. Ata-ananyń osy jaidy anyqtap berýin suraǵanda balabaqsha meńgerýshisi «Balańyzdy bizdiń balabaqshadan alyńyz, unamasa ákelmeýińiz kerek edi» dep dóreki jaýap bergen".
Balalar emhanasynda balaǵa tigis salynyp, jaranyń aýyrlyǵyna bailanysty antibiotikter taǵaiyndaldy.
Ýchaskelik politseiler balabaqshadan tárkilegen beinejazbaǵa sáikes, bala dene jaraqatyn alǵany rastalyp otyr. Videoda bala jylap, ieginen ustap, ózi dárethanaǵa barady, qandy ózi jýady, topqa baryp, jatady. Beinejazbada balalar óz betterimen qalyp, eresektersiz balabaqshanyń ekinshi qabatynda jatqany da baiqalady. Tárbieleýshi 20 minýt ótken soń kelip, 4 jasar qyzdyń jeidesin aýystyrady.
QR ÁQBtK-niń 409-babynyń 3-bóligimen balabaqsha meńgerýshisine 50 AEK mólsherinde aiyppul salý arqyly ákimshilik is qozǵaldy" - deidi vedomstvonyń baspasóz qyzmeti.
Aita keteiik, balabaqsha ashý jáne jumys isteý úshin ýákiletti organǵa habarlama jiberý jetkilikti. Sonymen qatar, memlekettiń balabaqshalarda qandai jaǵdai jasalǵanyn, qabyldanǵan tárbieshilerdiń biliktiligi qandai, sanitarlyq-órt jaǵdaiy eń tómengi talaptarǵa sai ma, sony baqylaý qyzmeti joq. Bilim bólimderiniń mektepke deiingi uiymdardy aralap, tekserýge zańdy quqyǵy joq.
Osyǵan bailanysty balabaqshalardyń litsenziiasyn qaitarý qolǵa alynyp jatyr. Bul balabaqshalardaǵy jaǵdaidyń sapasyna, qyzmetkerlerdiń biliktiligine, sanitarlyq jáne órt qaýipsizdigi erejeleriniń saqtalýyna, tamaq ónimderiniń sapasyna, beinebaqylaý kameralarynyń jumysyna jáne t.b. talaptardy belgileidi.
