Ótken aptada elimizde jedel járdem kóligin shaqyrtýshylar sany kúrt artty. Bul týraly Ulttyq shuǵyl meditsinany úilestirý ortalyǵy basqarma tóraǵasynyń mindetin atqarýshy Baýyrjan Júsipov aitty, dep habarlaidy QazAqparat.
«Osy jyldyń 5 aiynda jedel kómek brigadalarymen 3 mln-nan astam shaqyrtý boiynsha kómek kórsetildi. Jalpy, respýblika boiynsha jedel meditsinalyq kómek brigadalary kúnine 18 myń shaqyrtýǵa shyqty. Sonymen qatar osy jyldyń maýsym aiynda jedel kómek shaqyrtýlardyń 10 paiyzǵa óskeni baiqalady. Onyń ishinde aitarlyqtai ósim maýsymnyń 15-22-si aralyǵynda tirkeldi. Bul kúnderi jedel kómek brigadalary táýligine 22 myńnan astam shaqyrtýlarǵa qyzmet kórsetti», - dedi ol Ortalyq kommýnikatsiialar qyzmetindegi brifing barysynda.
Onyń atap ótýinshe, óńirler bólinisinde shaqyrtýlardyń ósýi Aqtóbe, Qyzylorda oblystarynda, Shymkent, Almaty jáne Nur-Sultan qalalarynda baiqalyp otyr.
«Osyǵan bailanysty jedel kómek brigadasynyń shaqyrtý ornyna deiin kelý ýaqyty 12 minýttan 13 minýtqa artqany baiqalady. Bul rette aita ketý kerek, bekitilgen erejege sáikes kelý ýaqyty shaqyrtýlardyń jedeldik sanatyna bailanysty. Iaǵni, naýqastyń ómirine nemese densaýlyǵyna qaýip tóngen jaǵdaida jedel meditsinalyq kómek brigadalarynyń kelý ýaqyty 10-15 minýttan aspaýy tiis. Al patsienttiń ómirine ne densaýlyǵyna aiqyn qaýip bolmaǵan jaǵdaida kelý ýaqyty 60 minýtqa deiin ózgeredi», - dedi Baýyrjan Júsipov.
