Túrkistan oblystyq politsiia departamenti jazýshy Aiagúl Mantaidyń ólimi boiynsha qylmystyq is qozǵady, dep habarlaidy "Ult aqparat".
Resmi málimetke sáikes, jazýshynyń óz-ózine qol salý oqiǵasy Jetisai aýdandyq politsiia bólimshesinde tirkeldi. Qazirgi kezde Qylmystyq kodekstiń 105-baby ("Ózin-ózi óltirýge deiin jetkizý") boiynsha tergeý sharalary júrgizilip jatyr.
"Politseiler qajetti is-sharalardy atqarýda. Tiisti saraptamalar taǵaiyndaldy. Oqiǵanyń tolyq mán-jaiy tergeý barysynda anyqtalady", - delingen politsiianyń resmi habarlamasynda.
Aita keteri, 29 shilde kúni jas jazýshy Aiagúl Mantai qaitys bolǵany týraly habar tarady. Onyń áriptesteri aqparatty rastady.
Aiagúl Mantai Túrkistan oblysy Maqtaral aýdany Baiqonys aýylynda dúniege kelgen. Resei halyqtar dostyǵy ýniversitetinde oqydy.
2009 jyly "Jalyn" baspasynan "Jańbyrly kóktem" atty áńgimeler jinaǵy jaryq kórgen. "Júrekke oralý" kitabynyń avtory.
"Serper" jastar syilyǵynyń laýreaty. 2010 jyly Ádebiet nominatsiiasy boiynsha prezident stipendiiasynyń iegeri atandy.
Áleýmettik jelide jas jazýshynyń ólimi qyzý talqylanyp jatyr. Mantaidy sýitsidke itermeledi degen boljam bar. Keibir qoldanýshylar Aiagúldiń jaqyn dosy jazýshynyń bireýmen jazysqan hatynyń skrinin jelige salyp jiberdi deidi. Sodan Mantaiǵa qarsy "kiberbýlling bastalyp ketken".
