Foto: Jazýshylar odaǵy
Qazaqstannyń mádeni jáne ádebi ortasy qara jamyldy. Belgili jazýshy, esseist, ádebiettanýshy-ǵalym, filologiia ǵylymdarynyń kandidaty, Qazaqstannyń eńbek sińirgen qairatkeri Maqsat Táj-Murat 66 jasynda dúnieden ótti. Bul týraly Qazaqstan Jazýshylar odaǵynyń Basqarmasy habarlady.
Odaq marqumnyń týǵan-týystaryna, áriptesterine jáne barsha oqyrman qaýymǵa qaiǵyryp kóńil aitty.
Maqsat Ánesuly Táj-Murat 1959 jyly qarasha aiynda Atyraý oblysyna qarasty Qosshaǵyl kentinde dúniege kelgen. Ol 1978-1983 jyldary Qazaq memlekettik ýniversitetiniń (qazirgi ál-Farabi atyndaǵy QazUÝ) jýrnalistika fakýltetinde bilim alǵan.
Eńbek jolyn 1983 jyly «Bilim jáne eńbek» jýrnalynda ádebi qyzmetker bolyp bastaǵan ol keiin «Sotsialistik Qazaqstan» gazetinde tilshi, «Órken» basylymynda redaktordyń orynbasary, «Jalyn» jýrnalynyń jaýapty hatshysy qyzmetterin atqardy. Sondai-aq Qazaqstan LKJO Ortalyq komitetinde jastar buqaralyq aqparat quraldary sektorynyń meńgerýshisi boldy.
1990-1999 jyldary QazMÝ-diń filologiia fakýltetinde aǵa oqytýshy jáne dotsent bolyp eńbek etti. 1994 jyly «Ǵumar Qarashtyń aqyndyǵy» taqyrybynda kandidattyq dissertatsiia qorǵaǵan.
Keiingi jyldary ol qazaq baspasóziniń jetekshi tulǵalarynyń biri retinde tanyldy. 2006-2007 jyldary «Qazaq ádebieti» gazetiniń bas redaktorynyń orynbasary, 2007-2009 jyldary «Ana tili» gazetiniń bas redaktory, 2009-2013 jyldary «Astana» jýrnalynyń bas redaktory qyzmetterin atqardy.
Maqsat Táj-Murat – qazaq ádebietiniń tarihyn zerttep, ulttyq rýhaniiatty tereń taldaǵan eńbekterimen belgili tulǵa. Ol «Sháńgerei: jasampazdyq ómiri», «Batys Alash-Orda», «Ǵumar Qarash: ómiri men shyǵarmashylyǵy», «Qaharmandyq anatomiiasy», «Kábisa jyl» jáne «Dimash. Kogda jajdýt krika» atty eńbekterdiń avtory.
Jazýshynyń shyǵarmalary men zertteýleri qazaq ádebietiniń damýyna, baspasóz tarihynyń jańasha zerdelenýine zor úles qosty.
Marqumnyń imany salamat, topyraǵy torqa bolsyn.
