Qaraǵandy oblysynyń «Saryshaǵan» áskeri poligonynda Táýelsiz Memleketter Dostastyǵy qatysýshy memleketteri áýe shabýylyna qarsy qorǵanys birikken júiesi sheńberinde Áýe qorǵanysy kúshteriniń jaýyngerlik oq atýymen birlesken oqý-jattyǵýdyń belsendi fazasy ótti.
Oqý-jattyǵýdyń belsendi fazasyna QR Qorǵanys ministrliginiń basshylyǵy men shetel memleketteri áskeri delegatsiiasynyń ókilderi qatysty. Oqý-jattyǵý sheńberinde Qazaqstan ÁÁK ushqyshtary aviatsiialyq joiý quraldaryn jaýyngerlik qoldana otyryp, ushýlardy oryndady. Oqý-jattyǵýdy ótkizý barysynda qarý-jaraqtyń keń túri, onyń ishinde, shaǵyn, ortasha jáne úlken qashyqtyqtaǵy «áýe-áýe», «áýe-ústińgi bet» klasyndaǵy basqarylatyn zymyrandar, sondai-aq aviatsiialyq bombalar men ártúrli kalibrdegi basqarylmaityn zymyrandar qoldanyldy.
Iske qosý áýe jáne jerústi nysanalar boiynsha Sý-27, Sý-30SM, MiG-29, MiG-31 kóp fýnktsionaldy joiǵyshtarynan, sondai-aq Mi-35M jáne Mi-171Sh tikushaqtarynan júzege asyryldy. Bul rette oqý-jattyǵýda aviatsiialyq tehnikanyń tyń úlgilerin qoldana otyryp, jaýyngerlik qoldaný sheberligi pysyqtaldy. Áýe shabýylyna qarsy qorǵanys áskerleriniń jaýyngerlik eseptoptary áýe mejeleri boiynsha S-300, S-200, S-125, S-75 «Kýb» jáne «Krýg» zenittik zymyran keshenderinen iske qosýdy júzege asyrdy jáne áýe qarsylasyn aldyn ala taný máselelerin pysyqtady. Belsendi fazany ótkizý kezeńinde armiialyq aviatsiia áskeri áýeailaqtardan ushýlardy júzege asyrdy.
Sondai-aq birlesken oqý-jattyǵý sheńberinde jerústi ornatylǵan brondy transporter mejeleri jáne kók aspanda shartty ilinip qalatyn tikushaq boiynsha shartty qarsylastyń áýe nysanyn almastyratyn ROBÝD-50 ulǵaitylǵan qashyqtyqtaǵy reaktivti jaryqtandyrý patrondary boiynsha oryndalǵan áýe shabýylyna qarsy qorǵanys eseptoptyq bólimsheleriniń jaýyngerlik oq atýlary ótti.
Ótkizilip jatqan birlesken oqý-jattyǵýdyń maqsaty jaýyngerlikke jaqyndatylǵan elimizdiń áýe shepterin qorǵaý jóninde Áýe qorǵanysy kúshteri ekipajdary men jaýyngerlik eseptoptarynyń daǵdylaryn jetildirý, sonymen qatar, jaýyngerlik kezekshilikti birlesip atqarý kezinde TMD ÁShQQ kúshteri men quraldarynyń ózara is-qimylyn pysyqtaý bolǵanyn aita ketý qajet.
