QR Premer-Ministriniń orynbasary Berdibek Saparbaev bilim jáne áleýmettik-mádeni salaǵa qatysty túrli máseleler jóninde keńes ótkizdi, dep habarlaidy "Ult aqparat".
Keńeske QR bilim jáne ǵylym, mádeniet jáne sport, ishki ister, syrtqy ister, qarjy, aqparat jáne qoǵamdyq damý ministrlikteriniń ókilderi qatysty. Beinekonferentsiia bailanysy rejiminde balalar quqyǵy jónindegi ýákiletti Arýjan Sain, oblystardyń, Nur-Sultan, Almaty jáne Shymkent qalalarynyń ákimderiniń orynbasarlary qatysty.
Kún tártibinde mektep oqýshylarynyń sabaqtan tys, kanikýl kezinde jáne demalys kúnderi ispen shuǵyldanýyn jáne bos ýaqytyn ótkizýin uiymdastyrý maqsatynda jumys istep turǵan mádeniet, sport, bilim nysandaryn paidalaný máselesi qaraldy.
Bilim jáne ǵylym ministrliginiń derekteri boiynsha, elimizdegi mektepterdiń 86%-y sport jáne akt zaldarymen qamtamasyz etilgen. Mektepterde 39 440 sport sektsiialary bar, olarǵa 1 mln 150 myń bala qatysady. BǴM, MSM jáne ákimdikterdiń bilim berý, mádeniet jáne sport nysandaryn balalardyń bos ýaqytyn ótkizýin qamtamasyz etý maqsatynda utymdy paidalaný máseleleri jónindegi birlesken buiryǵy ázirlengen.
«Qolda bar infraqurylymnyń qoljetimdiligi men tiimdi paidalanylýyn uiymdastyrý qajet. Jyl saiyn elimizde júzdegen jańa nysandar: sporttyq ǵimarattar, mýzeiler, teatrlar salynady. Árbir mektepte derlik sport jáne akt zaldary bar, olardy sabaqtan bos ýaqytta barynsha paidalanyp, qoljetimdi sektsiialar men úiirmeler uiymdastyrý kerek. Munyń barlyǵy jas urpaqtyń rýhani, adamgershilik tárbiesine, saýyqtyrylýyna, shyǵarmashylyq jáne áleýmettik turǵyda óz qabiletterin júzege asyrýyna yqpalyn tigizetin bolady», — dedi vitse-premer.
Sonymen qatar keńeste elimizdiń óńirlerinde sport infraqurylymdaryna qajettiligi zor óńirlerde 100 dene shynyqtyrý-saýyqtyrý keshenderin salý barysy talqylandy.
Elbasy tiisti tapsyrmany «Qazaqstandyqtardyń ál-aýqatynyń ósýi: tabys pen turmys sapasyn arttyrý» Joldaýynda berdi. Ony iske asyrý maqsatynda Mádeniet jáne sport ministrligi salý josparlanǵan dene shynyqtyrý-saýyqtyrý keshenderiniń tizimin ázirledi, oǵan sáikes 2019 jyly 22 nysandy, 2020 jyly 37-sin, 2021 jyly 41 nysandy paidalanýǵa berý kózdelgen.
Budan ózge, keńes qatysýshylary Abai Qunanbaiulynyń 175 jyldyǵyn, Ál-Farabidiń 1150 jyldyǵyn jáne Altyn Ordanyń 750 jyldyǵyn atap ótýge daiyndyq máselelerin, QR Tuńǵysh Prezidenti – Elbasyn qorynyń «El úmiti» jáne «Qamqorlyq» bastamalaryn iske asyrý, sondai-aq, mektepterdi politsiia ýchaskelik inspektorlarymen qamtamasyz etý máselelerin talqylady.
Keńes qorytyndysyn shyǵara otyryp, vitse-premer jasóspirimder arasyndaǵy quqyq buzýshylyqtyń aldyn alý máseleleri tóńireginde vedomstvoaralyq kooperatsiianyń qajet ekenin atap ótti.
«Beiindi organdar arasynda tiisti ózara is-qimyl joq. Mektep jáne ýchaskelik inspektorlar, áleýmettik qyzmetkerler, psihologtar men pedagogtar tyǵyz yntymaqtastyqta jasóspirimder arasyndaǵy quqyq buzýshylyqtyń aldyn alyp, ómirlik qiyn jaǵdaiǵa tap bolǵan balalardy anyqtap, olarmen jumys jasaýy tiis. Sonymen birge jaýapkershilik tek mektepke júktelmeidi. Birinshiden, balany tárbieleý – bul ata-ananyń mindeti jáne jaýapkershiligi», — dep qorytyndylady B. Saparbaev.
