E.A. Bóketov atyndaǵy Qaraǵandy ýniversitetiniń jataqhanasynda eki stýdentke pyshaq salǵan jigit qamaýǵa alyndy. Zardap shekkenderdiń biriniń jaǵdaiy áli de aýyr, dep habarlaidy QazAqparat.
«Qaraǵandy tergeý sotynyń sýdiasy tergeýshiniń ótinishin qanaǵattandyryp, kúdiktige eki ai merzimge «kúzetpen ustaý» sanktsiiasyn berdi», - dep habarlady Qaraǵandy oblystyq sotynyń baspasóz qyzmeti.
Qazirgi ýaqytta tergeý júrip jatyr. Sonymen qatar psihologiialyq-psihiatriialyq saraptama taǵaiyndaldy.
Esterińizge sala keteiik, 22 qazan kúni saǵat 02.40 shamasynda E.A. Bóketov atyndaǵy Qaraǵandy ýniversitetiniń jataqhanasynan aýrýhanaǵa pyshaq jaraqatymen 17 jáne 18 jastaǵy eki stýdent tústi. Atalǵan fakti boiynsha sotqa deiingi tergeý bastaldy. Oqiǵa ornynda 17 jastaǵy kúdikti ustaldy, ol stýdentterge pyshaq jaraqat salǵanyn moiyndady.
«18 jastaǵy jábirlenýshiniń jaǵdaiy turaqtandy, ol palataǵa aýystyryldy. Al 17 jastaǵy stýdenttiń jaǵdaiy áli de aýyr, ol jansaqtaý bóliminde jatyr», - delingen Qaraǵandy oblysynyń Densaýlyq saqtaý basqarmasynyń baspasóz qyzmeti taratqan aqparatta.
