Agroónerkásiptik keshendi qoldaý is-sharalarynyń biryńǵai elektrondyq resýrsy qurylady. Bul týraly Úkimet otyrysynda QR Aýyl sharýashylyǵy ministri Saparhan Omarov aitty, dep habarlaidy QazAqparat.
«Agroónerkásiptik keshen sýbektilerin qarjylandyrýdyń qoljetimdiligin arttyrý maqsatynda salalyq memlekettik qoldaý baǵdarlamalaryna qosý jolymen ekinshi deńgeidegi bankter, Qazaqstannyń Damý Banki jáne sindikattalǵan qaryzdar arqyly aýyl sharýashylyǵy sektoryna kredit berý múmkindikterin keńeitý josparlanyp otyr», - dedi agroónerkásiptik keshendi damytýdyń negizgi baǵyttary jáne investitsiialyq jobalardyń iske asyrylýy týraly baiandaǵan Saparhan Omarov.
Ministrdiń aitýynsha, aýyl sharýashylyǵy ónimderin forvardtyq satyp alýdy keńeitý jáne jastar úshin aýyl sharýashylyǵy salasyndaǵy jobalardy iske asyrýǵa granttar engizý múmkindigi qarastyrylyp jatyr.
«Sondai-aq, barlyq agroónerkásiptik keshendi qoldaý is-sharalarynyń biryńǵai elektrondyq resýrsy qurylatyn bolady», - dedi ministr.
