«Jastar tájiribesi» baǵdarlamasyna qatysqandardyń 50 paiyzy turaqty jumysqa ornalasady. Bul týraly QR Eńbek jáne halyqty áleýmettik qorǵaý vitse-ministri Erjan Birjanov aitty, dep habarlaidy QazAqparat.
«Jastar úshin «Alǵashqy jumys orny», «Jastar tájiribesi» syndy baǵdarlamalar jumys isteidi. Baǵyt óte kóp. Niet bolsa jumys tabylady. Kópshiligi keide jumystyń bul túrlerine barǵylary kelmeidi. Aitalyq, jastar praktikasy boiynsha ailyq jalaqy 73 myń teńge. Jastar bári qymbat, al jalaqysy ne bári 73 myń teńge dep oilaidy. Biraq, baǵdarlama jas býyn birinshi daǵdy alýy úshin iske qosylǵan», - dedi Erjan Birjanov QazAqparat tilshisine bergen suhbatynda.
Vitse-ministrdiń atap ótýinshe, bul baǵdarlamaǵa qatysqan jas mamanǵa tólenetin qarjy munymen shektelmeidi. Jergilikti atqarýshy organ tarapynan da, jumys berýshi tarapynan da jalaqyny qosymsha sýbsidiialaý múmkindigi qarastyrylǵan.
«Búginde jastardyń qajettiligi artyp keledi. Olarǵa bolmashy jalaqyǵa bola jumys isteý qiyndyq týdyrady. Biraq, qalai degende de birdeńeden bastaý qajet qoi. Eger jastar bul baǵdarlamalarǵa qatysatyn bolsa, onda óte jaqsy. Jyl saiyn 27 myńnan astam adam memleket jalaqysyn óteitin jastar tájiribesine qatysady», - dedi ol.
Aita keterligi, «Jastar tájiribesi» baǵdarlamasy aiasynda maman 6 ai boiy jumys isteidi. Statistikaǵa sáikes, osy merzim ishinde jastardyń 50 paiyzy sol orynǵa turaqty jumysqa ornalassa, qalǵan 50 paiyzy jańa jumys izdeýge májbúr bolady. Al kelesi baǵdarlama «Alǵashqy jumys orny» dep atalady.
«Alǵashqy jumys orny» - bul ýniversitet túlegi óz mamandyǵy boiynsha uiymǵa jumysqa ornalasýy. Jergilikti atqarýshy organ jyl boiy ailyq jalaqysyn ótep otyrady. Bir jyl bitkennen keiin ol atalǵan uiymda turaqty jumysqa ornalasady degen jospar bar», - dedi vitse-ministr.
