.jpg)
Foto: Májilistiń baspasóz qyzmetinen
Búgin Májilis otyrysynda «AMANAT» partiiasy fraktsiiasynyń múshesi, depýtat Danabek Isabekov otandyq animatsiia máselesin kóterip, premer-ministrdiń orynbasary Tamara Dúisenovaǵa depýtattyq saýal joldady dep habarlaidy "Ult Aqparat".
Onyń sózinshe, qazir qazaqy aýylda týyp, tanymy qalyptasyp kele jatqan jasóspirimderdiń tili orys nemese aǵylshyn tilinde shyǵyp jatyr jáne bizdiń balalar jat el ideologiiasynyń qurbanyna ainalyp, óziniń ulttyq bolmysyna jat, sanasyna sai kelmeitin ónimderdi tutynýda eken. Onyń sebebin depýtat Qazaqstanda animatsiia salasynyń damymaǵanymen túsindirdi. Sondyqtan Danabek Isabekov otandyq animatsiia salasyn zamanaýi talaptarǵa sai damytý qajet dep esepteitinin aitty.
Depýtattyń saýalynyń tolyq nusqasy:
Premer-ministrdiń orynbasary
Tamara Bosymbekqyzy Dúisenovaǵa
Prezident Qasym-Jomart Toqaev tsifrlyq zamanda «rýhani qundylyqtar men adamgershilik qasietter týraly máseleni qaita kún tártibine qoiý kerek» dep atap ótti.
Jetkinshek urpaqty ultymyzdyń dástúrli qundylyqtaryna sáikes tárbieleý tetigi - otandyq animatsiiany damytý. Búginde, qazaqy aýylda týyp, tanymy qalyptasyp kele jatqan jasóspirimderdiń tili orys nemese aǵylshyn tilinde shyǵýda. Buǵan áser etetin faktor kóp. Onyń ishindegi eń negizgisi YouTube pen TikTok-tyń yqpaly zor. AQSh, Germaniia, Frantsiia, Angliia, Japoniia jáne Qytai animatsiia salasyna strategiialyq mańyz berip, milliondap, tipti milliardtap qarjy quiady. Shyǵys Aziia elderi – Koreia, Japoniia men Qytai animatsiiasy ulttyq sipatta damysa, Eýropa men AQSh-ta kommertsiialyq baǵytta biznestiń bir quralyna ainaldy.
Kórshi Resei Federatsiiasy balalarǵa arnalǵan animatsiialy filmderdi ideologiia quraly retinde paidalaný úderiske ainaldy. Onyń aiqyn mysaly, 2020 jyly Máskeý biligi mýltimedia salasyn sýbsidiialaýǵa 300 million rýbl bólip, animatsiiasynyń sany men sapasyn arttyrýǵa mán berdi. Sonyń áserinen bolar, Resei 2010 jyly 25 myń minýtqa jetetin mýltfilm shyǵarsa, 2020 jyly 55 myń minýttan asyrdy. Resei jylyna 200 saǵat animatsiialyq ónim usynsa, Qytai 3 myń saǵat efir daiyndaidy.
Resmi Pekin animatsiia salasyna erekshe ekpin berip, ózderi óndirgen animatsiiasynyń ýaqytyn 300 myń minýtqa jetkizip, álemde birinshi orynǵa shyqty.
Bizdiń balalar jat el ideologiiasynyń qurbanyna ainalyp, óziniń ulttyq bolmysyna jat, sanasyna sai kelmeitin ónimderdi tutynýda. Óitkeni bizdiń el animatsiia salasynda maqtana almaidy. Qazir jasóspirimder shetel animatsiiasyn óziniń tól týyndysyndai tutynyp, qalyń qazaq otyrǵan aýyldaǵy besik balalarynyń tili ne orys, ne aǵylshyn tilinde shyǵýda. Óitkeni otandyq animatsiiada tyń oi, jańashyl jańalyq jetkizýi jaǵy kemshin. Burynǵy súrleýmen júrip, kúrdeli, filosofiialy týyndylar usynady. Balalar mundai týyndyny qabyldai almaidy ári qyzyqpaidy.
AMANAT fraktsiiasy jetkinshek urpaqtyń rýhani bet-álpeti memleket bolashaǵynyń tamyry dep biledi!
Otandyq animatsiia salasyna jańa serpin berý qajet!
Ol úshin:
Úkimet ulttyq animatsiia ónimderin sýbsidiialaý kólemin arttyrýy kerek. Eldegi mýltiplikator mamanyn daiarlaityn oqý oryndary 2D animatsiiasy boiynsha bilim berýmen shektelmei, 3D formatty igerýge basymdyq berýi mindet. Kásibi stsenarist pen talantty sýretshiler jáne IT mamandar birlese jumys istep, sapaly animatsiialyq ónimder daiyndaýdy jolǵa qoiý mańyzdy.
Qazir balalar tez qozǵalatyn, ary ketse 10-15 sekýndta sozylatyn, óziniń dúnietanymy men kózqarasyna sai keletin, boiaýy qanyq dúnielerge qyzyǵady. Endeshe, jasóspirimderdiń tanym-túsinigine sai qysqa metrajdy animatsiia ónimderin kóbeitý mańyzdy.
Animatsiia salasyn zamanaýi talaptarǵa sai damytý úshin IT mamandardy tarta otyryp, ideologtar men psihologtar, kerek bolǵan jaǵdaida, pedagogtardy tartýdy oilastyrý ózekti. Onsyz álem alpaýyty Disney syndy sapaly ónimder túsirý múmkin emes.
Mádeniet jáne sport ministrligi men Oqý-aǵartý ministrligi birigip, otandyq animatsiiany damytýda kontseptsiia daiyndaýy mańyzdy.
