Qazaqstanda COVID-19 indetimen birinshi bolyp EKMO apparatyna qosylǵan naýqas emdelip shyqty, – dep habarlaidy Ulttyq ǵylymi kardiohirýrgiia ortalyǵynyń baspasóz qyzmeti.
«Kúnimizdi jaqsy jańalyqtan bastap otyrmyz. COVID-19 indetimen birinshi bolyp EKMO apparatyna (júrek pen ókpe fýnktsiiasyn qoldaýǵa arnalǵan ekstrakorporaldy membrandyq oksigenatsiia apparaty) qosylǵan naýqas emdelip shyqty. Er adam óziniń 30 jasqa tolǵan mereitoiyn osy apparatta qosylǵan kúiinde qarsy alǵan edi. Qazir onyń jaǵdaiy jaqsy», - delingen ortalyq málimetinde.
Aita keteiik, osy qýanyshty oqiǵa Respýblikalyq qarqyndy terapiia ortalyǵy dárigerleri men tótenshe jaǵdai kezeńine qurylǵan Sarapshylyq toptyń jemisti ári birlesken jumysynyń nátijesi bolyp otyr. Sarapshylyq top koronavirýs infektsiiasyna shaldyqqan naýqastarǵa qarqyndy terapiia kórsetý úshin qurylǵan bolatyn. Sarapshylyq toptyń negizgi maqsaty – elimizdegi meditsinalyq uiymdarda COVID-19 juqtyrǵan aýyr jaǵdaidaǵy barlyq adamdardy emdeý ári diagnostikalyq kómek kórsetý tásilin úilestirý men qadaǵalaý.
Elimizdegi barlyq naýqastar Sarapshylyq top pen Respýblikalyq qarqyndy terapiia ortalyǵy mamandarynyń turaqty baqylaýynda boldy. Kún saiyn kosiliým ótkizilip, sodan keiin infektsiia juqtyrǵan naýqastardy emdeýge qatysty sheshimder jasalyp otyrdy.
