Áskerde qaitys bolǵan jas sarbaz Álibek Qalbaidyń ólimine qatysty tergeý sharasy jalǵasyp jatyr. Bul týraly QR Qorǵanys ministrliginen málim etti, dep habarlaidy QazAqparat agenttigi.
«2022 jyldyń basynda Qazaqstan Respýblikasy Qarýly kúshterinde merzimdi qyzmettegi áskeri qyzmetshi, qatardaǵy jaýynger Á. S. Qalbai qaitys boldy. Bul rette, jeke quramdy jetkiliksiz baqylaý jáne 30212 áskeri bóliminiń laýazymdy tulǵalary tarapynan jumystaǵy olqylyqtar faktisi boiynsha Qorǵanys ministriniń tapsyrmasy boiynsha qyzmettik tergeý júrgizildi. Nátijesinde 30212 áskeri bóliminiń komandiri jáne osy bólimniń oqý rotasynyń komandiri laýazymynan shettetildi», - degen jaýap berildi ministrlikten.
Odan bólek, sarbaz ólimine bailanysty atalǵan áskeri bólimniń taǵy 3 laýazymdy tulǵasy qatań tártiptik jaýapkershilikke tartylǵan.
Sondai-aq Qorǵanys ministrligi Álibek Qalbaidyń ólimine qatysty tergeý sharasynyń jalǵasyp jatqanyn habarlady.
«30212 áskeri bóliminiń kadr quramynyń sapasyn arttyrý maqsatynda qanaǵattanarlyqsyz nátije kórsetken laýazymdy tulǵalarǵa qatysty uiymdastyrý-kadr sipatyndaǵy sharalardy iske asyra otyryp, 1 ai merzimde ofitserlik jáne serjanttyq quramdy attestattaýdan ótkizý týraly sheshim qabyldandy. Attestattaýdan keiin bosaǵan laýazymdy oryndarǵa kadr jinaý úshin irikteý júredi», - deidi vedomstvodan.
Eske sala keteiik, biyl 22 sáýirde Álibek Qalbai Jambyl oblysynda Gvardeisk áskeri qalashyǵyndaǵy gospitalde merzimdi áskeri qyzmetke shaqyrylǵan sarbaz kóz jumdy.
Prezident Qasym-Jomart Toqaev áskerde qaza tapqan sarbazdyń otbasyna kóńil aityp, istiń sebebin anyqtaýdy tapsyrdy.
Odan bólek, Qorǵanys ministrliginen Álibek Qalbaidyń otbasyna qarjylai kómek kórsetiletini aityldy.
