Seisenbi, 24 tamyz kúni ashylatyn Paralimpiada oiyndary qarsańynda Japoniiada koronavirýs indeti órship, kúndelikti tirkeletin naýqas sany rekord jańartyp jatyr.
Senbi, 21 tamyz kúni elde úshinshi kún qatarynan 25 myńnan astam naýqas tirkeldi. Bir Tokionyń ózinde bes myńnan astam adamnan koronavirýs anyqtaldy.
Olimpiada oiyndaryndaǵydai, munda da qatań karantin sharalary saqtalmaq.
Paralimpida komitetiniń jetekshisi Endriý Parsons jarystyń múgedek azamattar úshin mańyzdy ekenin atap ótip, qatysýshylardy toqmeiilsimeýge shaqyrdy.
"Sirá, jarys oryndarynda kórermenniń bolmaýy qiyn bolaiyn dep tur. Biraq biz teledidar arqyly tórt milliardtan astam adamdy qamtimyz" dedi Parsons.
Jergilikti bilik qatań karantin sharalaryn ustana otyryp oiyndardy qaýipsiz jaǵdaida ótkizýge bolady deidi.
Qatysýshylar paralimpiada aýylyna jarystyń aldynda ǵana kirip, aiaqtalǵan soń 48 saǵat ishinde shyǵyp ketýi tiis.
Olardan kún saiyn analiz alynady, júrip-turýy shekteledi.
Munyń bári paralimpiada oiyndarynyń koronavirýs indetiniń oshaǵyna ainaldyrmaý úshin qajet.
1 shilde men 22 tamyz aralyǵynda Olimpiada oiyndaryna qatysy bar 552 adamnyń PTR testi oń nátije kórsetken. Olardyń kóbi Olimpiada komiteti jaldaǵan japon azamattary. Osy kúnge deiin koronavirýs Paraolimpiada oiyndaryna qatysy bar degen 138 adamnan anyqtaldy, olardyń da kóbi japondar.
Biraq Olimpiada komiteti indettiń taraýy men oiyndardyń arasynda tikelei sebep-saldarlyq bailanys joq, elde indet onsyz da órshi bastaǵan deidi.
Jarys 22 sport túrinen ótedi. Sportshylar múgedektiginiń sipatyna qarai top-topqa bólinip jarysady. Badminton men thekvondo alǵash ret qosylyp otyr.
Qazaqstan paralimpiadaǵa jeti sport túrinen 25 atlet jibermek.
