Japoniianyń batysyndaǵy Nara qalasynda belgisiz adam burynǵy premer-ministr Sindzo Abege oq atty. Abeniń jaǵdaiy týraly naqty málimet joq. Onyń mert bolǵany jaily túrli aqparat tarap jatyr. Politsiia ókili saiasatkerdiń júregi toqtaǵanyn aitqan. Biraq aqparat ázirge resmi túrde rastalmady.
Japon úkimetiniń hatshysy Hirokadzý Matsýno jýrnalisterge Abeniń oqqa ushqanyn rastaǵanmen, jaǵdaiy belgisiz ekenin aitty.
NHK telearnasy men Kiodo Tsýsin agenttiginiń habarlaýynsha, Abe Nara vokzaly mańyndaǵy miting kezinde sóilegen kezde tý syrtynan bireý eks-premerdiń arqasyna eki ret oq atqan. Abe jurtty aldaǵy jeksenbi kúni ótetin Senat sailaýynda óz partiiasy atynan qatysatyn kandidatty qoldaýǵa úndegen. Jaraqattanǵan premer esinen tanyp qalǵan. Kýágerlerdiń biriniń aitýynsha, ainalasyndaǵylar saiasatkerdiń júregine massaj jasaǵan. Burynǵy premer aýrýhanaǵa jetkizilgen.
Aqparatqa qaraǵanda, burynǵy premerge Nara qalasynyń 41 jastaǵy turǵyny Tetsýia Iamagami shabýyl jasaǵan. Ol adam óltirmek boldy degen kúdikke ilinip, qamaldy. Ázirge tolyq emes málimet boiynsha, ol eks-premerdi qoldan jasalǵan bytyra myltyqpen atqan. Politsiia qarýdy tárkilegen. Jergilikti BAQ-tyń jazýynsha, Tetsýia Iamagami buryn Japoniianyń teńiz kúshterinde qyzmet etken.
67 jastaǵy Sindzo Abe 2020 jyly premer-ministr qyzmetinen otstavkaǵa ketken. Biraq Japoniianyń basqarýshy liberal-demokratiia partiiasynda yqpaldy tulǵa bolyp qalǵan.
Abe - Japoniianyń 2006-2007 jáne 2012-2020 jyldardaǵy 57 jáne 63-premer-ministri.
