Fýkýoka prefektýrasyndaǵy kimono tigý men satý kompaniiasynyń prezidenti Ioshimasa Takakýra 2020 jyly Tokioda ótetin Olimpiada oiyndarynyń qarsańynda keremet joba oilap tapty, dep habarlaidy QazAqparat.
50 jastaǵy Takakýra Japoniia astanasynda ótetin Jazǵy Olimpiada oiyndaryna qatysýshy elderdi tanystyratyn dizainy erekshe kimono tigý ideiasyn usyndy.
«Men qatysýshy elderdiń delegatsiia basshylary Tokiodaǵy Olimpiadanyń ashylý saltanatynda kimono kiip, ulttar sherýinde júrip ótkenin kórgim keledi», - deidi Takakýra.
Joba 2014 jyly iske qosylǵan. Japon sheberleriniń qolynan shyqqan kiimder sońǵy jyldary Tokiodaǵy jáne AQSh-taǵy sán kórsetilimderine qatysty. Jobany 2020 jylǵy Olimpiada oiyndaryna qarsy aiaqtap, qatysýshy elderge 206 kimono tigý úshin Takakýra ǵalamtordan ártúrli platformalardy jáne niet bildirýshilerden qaiyrymdylyq qarjysyn jinaý úshin barlyq derekkózderdi paidalanady.
Sýretter men órnekterdi tańdaýmen ainalysatyn top kimononyń matasy arqyly memleketti tanystyrý úshin ár eldiń mádenietin, klimatyn jáne tabiǵi sulýlyǵyn jan-jaqty zertteidi.
Mysaly, Qazaqstandy tanystyratyn matanyń dizainyn 2016 jyly Kýmiko Machida jasaǵan. Ortalyq Aziianyń keń baitaq dalasynda shaýyp bara jatqan attyń beinesi - Qazaqstannyń qaisarlyǵynyń simvoly ispettes. Sol jaqtaǵy joǵaryda ornalasqan dóńgelek kún tabiǵatymyzdyń bailyǵyn kórsetedi. Sondai-aq, kimonoda Qazaqstannyń keń baitaq dalasy, ótken Astana Expo-2017 kórmesiniń simvoly – jel diirmen kórsetilgen.
Takakýranyń aitýynsha, japon mádenieti ózge elderdiń mádenietin qurmetteidi. Ol 2020 jylǵy Jazǵy Olimpiada oiyndary Tokioda ótetini belgili bolǵan soń kimono arqyly oiyndarǵa óz úlesin qosý úshin atalmysh jobany iske asyrý jóninde sheshim qabyldaǵan.
