Batys Qazaqstan oblysynda itti óltirdi degen kúdikti áieldiń ústinen qylmystyq is qozǵaldy, dep habarlaidy QazAqparat.
Instagram áleýmettik jelisindegi pablikterdiń birinde óltirilgen ittiń jáne ony óltirdi dep aiyptalǵan áieldiń fotosy jariialandy.
Sondai-aq sol áieldiń aýdiojazbasy taratyldy. Onda ol budan buryn da eki itti óltirgenin aitady. «Bul úshinshisi, anda taǵy basqalary júgirip júr. Janym rahattanyp qaldy. Taǵy óltirgim kelip tur, qolyma túspei tur», - dep kúledi áiel. Ekinshi aýdiojazbada osy daýys: «Meni qylmystyq is qozǵalatyny jóninde aityp qorqytyp jatyr. Men tezirek otyrsam, tezirek shyǵamyn dedim», - deidi ol.
Áleýmettik jelide atalǵan áieldiń Terekti aýdany Shóptikól aýylynda turatyny jazylǵan.
BQO Politsiia departamentiniń baspasóz qyzmeti oqiǵanyń Terekti aýdanynda bolǵanyn rastady.
«Habarlama Terekti aýdany politsiia bóliminiń biryńǵai tergep-tekserý tiziliminde tirkeldi. Janýarǵa qatygezdik jasaý deregi anyqtaldy. Qazirgi kezde QR QK 306-babyna sáikes qylmystyq is qozǵalyp, tergeý amaldary júrgizilýde. Áieldiń psihiiatriialyq aýrýhanada esepte turatyny jónindegi derek anyqtalmady», - dep habarlady vedomstvodan.
Atalǵan bap boiynsha aiypty dep tanylǵan adam 120 ailyq eseptik kórsetkishke deiingi mólsherde aiyppul salýǵa ne sol mólsherde túzeý jumystaryna ne 120 saǵatqa deiingi merzimge qoǵamdyq jumystarǵa tartýǵa ne 30 táýlikke deiingi merzimge qamaqqa alýǵa jazalanady.
