Jansaia Ábdimálik shahmattyń barlyq túrinen 20 jasqa deiingiler arasynda álem reitinginde kósh bastady. Buǵan deiin birde-bir qazaqstandyq shahmatshy bul biikke kóterile almaǵan, dep habarlaidy "Ult aqparat" Qazaqstan shahmat federatsiiasyna silteme jasap.
«Qyzym - meniń maqtanyshym. Ol únemi eńbektenedi, sheberligin tynymsyz jetildirip otyrady. Osynaý tarihi kórsetkish - onyń talai jylǵy eńbeginiń jemisi», - deidi sportshynyń ákesi Daniiar Áshirov.
Jansaia kishkentai kúninen shahmat oinaidy, 14 jasynda Qazaqstannyń eń jas grossmeisteri atandy. Qazir on segizge tolǵan boijetkenniń qorjyny respýblikalyq jáne halyqaralyq týrnirlerdiń júldelerimen tolǵan.
«Men únemi oiynǵa barymdy salýǵa tyrysamyn. Osy kúnge jetkizgen ata-anamnyń, bapkerlerimniń aldynda qaryzdarmyn. Iá, bul - jaqsy nátije, biraq toqmeiilsýge bolmaidy. Men úshin eń bastysy - kún saiyn keshegige qaraǵanda jaqsyraq oinaý», - deidi jas sportshy.
2018 jyldyń qarashasynda eresekter arasyndaǵy álem chempionatynda debiýtin toilaǵan Jansaia Qazaqstan shahmaty tarihynda shirek finalǵa shyqqan alǵashqy sportshy boldy. Al jeltoqsan aiynda rapid jáne blits boiynsha ótken álem chempionatynda áielder arasynda jyldam shahmattan 6-oryndy ielendi.
