Foto: ortcom.kz
Bas prokýrordyń orynbasary Jandos Ómiráliev Almatydaǵy órt shyqqan hosteldiń jertólede bolǵany týraly aqparatqa pikir bildirdi, dep habarlaidy Kazinform.
«Ǵimarattyń birinshi qabatynda jáne astyńǵy qabatynda (tsokolnyi etaj - eskertý) adamdar turǵan degen aqparat tarap jatyr. Árine, bul zańǵa sáikes kelmeidi. Sebebi zańda turǵyn úi jáne turǵyn úi emes degen norma bar. Turǵyn úi emes ǵimarattardyń qoldaný maqsatyn aýystyrý kerek. Biraq bizdiń aqparatymyzsha, ǵimarat ákimshiligi tarapynan aýystyrylmaǵan. Sondyqtan ǵimarattyń astyndaǵy qabattaǵy adamdardyń turýy meniń oiymsha zańǵa qaishy keledi», - dedi Jandos Ómiráliev.
Sondai-aq ol órtten qaitys bolǵan marqumdardyń jaqyndaryna kóńil aitty.
«Almatyda bolǵan órt – óte aýyr jaǵdai. Birinshiden, men (órtten) qaza bolǵan azamattardyń jaqyndary men týysqandaryna kóńil aitqym keledi. Ózderińiz bilesizder, búgin túngi saǵat 5.45-te (Almaty qalasy TJD-ǵa) órt týraly habarlama tústi. Bir saǵattyń ishinde órt sóndirýshiler (hosteldegi) órtti sóndirdi. Degenmen 13 adam qaitys boldy. Bul derek boiynsha Ishki ister organdary qylmystyq is qozǵady. Bul qylmystyq istiń sapaly, jan-jaqty tergelýi qamtamasyz etý úshin Bas prokýror tiisti úkim shyǵardy. Onyń tapsyrmasyna sáikes Bas prokýratýranyń bilikti qyzmetkerleri, sondai-aq Almaty qalasynyń prokýratýrasynyń qyzmetkerleri tergeý tobymen birge barlyq kúsh-jigerimizdi salyp, qysqa ýaqytta jaýapkershilikpen qaraý máselesin qarastyramyz», - dedi Bas prokýrordyń orynbasary.
