Jandarbek Bekshin Almatynyń bas sanitar dárigeri laýazymyn bosatady, dep habarlaidy QazAqparat.
Bul aqparatty QR Densaýlyq saqtaý ministrligi rastady.
Almaty qalasynyń bas sanitar dárigeri jáne QR DSM KSK Almaty qalalyq sanitarlyq-epidemiologiialyq baqylaý departamentiniń basshysy Jandarbek Bekshin zeinetke shyǵýyna bailanysty 5 qańtardan bastap qyzmetinen ketedi.
Eske salaiyq, Jandarbek Bekshin Almatynyń bas sanitar dárigeri qyzmetine 2020 jyldyń sáýir aiynda taǵaiyndaldy.
2019 jyldyń maýsym aiynan beri Densaýlyq saqtaý ministrliginiń taýarlar men kórsetiletin qyzmetterdiń sapasy jáne qaýipsizdigin baqylaý komiteti tóraǵasynyń orynbasary - bas memlekettik sanitar dáriger qyzmetin atqarǵan.
Buǵan deiin Jandarbek Bekshin Qazaqstan Respýblikasynyń bas memlekettik sanitar dárigeri qyzmetinde bolyp, laýazymynan bosatylǵan edi.
Jandarbek Bekshin 1958 jyly Qostanai oblysynda dúniege kelgen.
Almaty qalalyq sanitarlyq-epidemiologiialyq baqylaý departamentiniń habarlaýynsha, 27 jeltoqsannan 4 qańtarǵa deiin Jandarbek Bekshin eńbek demalysyna shyǵady.
Onyń qyzmetin ýaqytsha Qarlyǵash Ábdijabbarova atqarady.
