Almatynyń bas sanitar dárigeri Jandarbek Bekshin qaladaǵy epidemiologiialyq jaǵdaidyń kúrdeli ekenin aitty, dep habarlaidy Sputnik Qazaqstan.
"Qazir qala koronavirýstyń taralýy boiynsha "qyzyl" aimaqta tur. Órshýdiń eń birinshi sebebi – qalada taralyp jatqan mýtatsiiadan ótken shtammdar. Ótken aptada jinalǵan synamalardan ózgeris tabyldy. Qalada eki zerthana zertteý jumystaryn júrgizdi. Birinen britaniialyq shtamm men ońtústikafrikalyq shtamm tabyldy. Soǵan bailanysty arnaiy kúsheitilgen shekteý sharalaryn qabyldadyq", - dedi Jandarbek Bekshin.
Al Almaty qalasy qoǵamdyq densaýlyq basqarmasynyń basshysy Nariman Tabynbaev úi jaǵdaiynda emdelip jatqan naýqastar jaily aitty.
Qalada 5 myń infektsiialyq tósek-oryn jasaqtalǵan. Onyń ishinde 2 696 adam emdelip jatyr. Ishinde 108 bala bar. Naýqastar arasynda 32 adam asa aýyr jaǵdaida, 302 naýqas aýyr jaǵdaida, 2 362 naýqas ortasha deńgeide jatyr.
Reanimatsiia bóliminde 135 naýqas bar.
"Qazir 3 369 adam úi jaǵdaiynda emdelip jatyr. Ishinde 992 adam simptomsyz, qalǵany jeńil túrde aýyryp jatyr. Olardy telemeditsina ortalyǵy men jergilikti emhana dárigerleri baqylap otyr. Telefon arqyly, video arqyly jaǵdaiyn bilip turady. Jaǵdaiyna bailanysty jergilikti emhanaǵa habarlasady. Odan keiin mobildi top barady. Qajet bolsa, aýrýhanaǵa jetkizedi", - dedi Nariman Tabynbaev.
Úide emdelýge múmkindigi joq azamattarǵa shipajai nemese aýrýhanaǵa jatqyzýǵa jaǵdai jasalǵan.
"Úidegi naýqastyń janynda bolatyn adamdarǵa qaýip tónedi. Sondyqtan barynsha bólektený kerek. Eger bir-birine juqtyrǵan bolsa, jaǵdaiyna bailanysty mamandar jaǵdaiy aýyr adamdy aýrýhanaǵa áketip, jaǵdaiy turaqty naýqasty úide emdelýge qaldyrady. Bir otbasyda 3-4 adam aýyryp jatsa, múmkindiginshe balasymen birge anasyn bir aýrýhanaǵa jatqyzýǵa sheshim qabyldap jatyrmyz", - deidi Tabynbaev.
Bir úidiń eki adamy bir ýaqytta infektsiia juqtyrsa, aýrýhanada da bir bólmege jatqyzylady.
Mektepter onlain formatqa kóshti
Qalanyń bas sanitar dárigeriniń aitýynsha, biyl byltyrmen salystyrǵanda aýrý juqtyrǵan balalardyń sany birneshe ese artqan.
"Mýtatsiiadan ótken shtammdardyń ereksheligi balalarǵa da áserin tigizip jatyr. Byltyr jarty jylda 280 bala aýyryp shyqty, biyl 3 aida 1 468 bala aýyrdy. Balalardyń sany kóbeiýine bailanysty qatań sharalar engizdik. Barlyq mektepti onlain formatqa kóshirdik. Tek kezekshi synyptar qaldy. Oqýshylar sany 15-ten aspaidy. Bul – 1-5 synyptar jáne halyqaralyq deńgeidegi mektepterdegi 1-7 synyp oqýshylary. Biyl mektepti bitiretin 9,11-synyptarda kezekshi synyptar iske qosyldy. Olarda da bala sany 15-ten aspaidy", - dedi Jandarbek Bekshin.
Bul shekteýler memlekettik mektepterge ǵana emes, jeke menshik mektepterge de qatysty.
Almatyda karantin kúsheitildi
Jandarbek Bekshin qol qoiǵan jańa qaýlyǵa sáikes, epideomiologiialyq jaǵdai ýshyqqan kezde de Ashyq qosymshasyna qosylǵan mekemelerdiń jumysy jalǵasa beredi.
Halyqqa qyzmet kórsetý ortalyqtary, "Qazposhta" bólimderiniń jumys ýaqytyna shekteý qoiylmaǵan. Aldyn ala jazylý boiynsha qabyldaidy.
Dámhana, meiramhanalardyń jazǵy ashyq alańdary ǵana jumys isteidi, tek jartylai tolýy kerek. Ústelder araqashyqtyǵy eki metrden kem emes.
Stýdentter oqý jylynyń sońyna deiin qashyqtan oqidy, jataqhanada turmaidy.
Mektep oqýshylary da negizinen qashyqtan bilim alady.
