Májilis depýtaty Edil Jańbyrshin Prezident Joldaýynda aitylǵan máselelerge qatysty málimdeme jasady, dep habarlaidy "Ult aqparat".
«Memleket basshysy Qasym-Jomart Kemeluly Toqaev 1 qyrkúiekte halyqqa Joldaýyn jariialap, tyń bastamalar kóterdi. Sonyń ishinde, biylǵy kúzde kezekten tys Prezident sailaýyn ótkizý týraly aitty. Bul usynys sarapshylar ǵana emes, búkil qoǵam tarapynan qyzý pikir-talas týdyryp jatyr. Ony Parlament Májilisindegi «Jańa Qazaqstan» depýtattyq tobynyń músheleri de talqylady. Osyǵan orai oiymyzdy ortaǵa salýdy jón kórdik», - dep atap ótti depýtat óz málimdemesinde.
Jańbyrshin bastaǵan depýtattar toby ár máselege jeke-jeke toqtaldy.
Birinshi. Biyl elimizde konstitýtsiialyq reforma qolǵa alyndy. Jańa, Ádiletti Qazaqstan quramyz, «Ekinshi Respýblika» modeline kóshemiz dep jariialadyq. Memlekettik júieni, sonyń ishinde memleket basqarý isin jańǵyrtý qajet ekeni daýsyz. Iaǵni, bul – demokratiialyq basqarý modeline kóshýge jol ashatyn bastama. Sondyqtan, qaita sailaný quqyǵynsyz 7 jyldyq bir merzimdi engizý durys bastama. Eshkim Prezident biligin uzaq jyldar boiy iemdenbeidi. Bul elimizdiń sýperprezidenttik bilikten tolyq ketkenimizdi bekite túsedi.
Ekinshi. Qazir álemdegi keibir elderde memleket basshysynyń ókilettigin uzartý boiynsha bastamalar kóterilip jatqan tusta, bizdiń elimizde kerisinshe Prezident ókilettigin qaita sailaný quqyǵynsyz 7 jyldyq bir merzimmen shekteý – elimizdiń demokratiialyq baǵytty berik ustanǵanyn kórsetedi.
Úshinshiden, eger Prezident kezekten tys sailaýda 5 jylǵa sailanyp, sodan soń 7 jyldyq merzimdi engizetin bolsa, onda qazirgi Prezidenttiń úshinshi merzimge sailanýyna quqyqtyq negizder paida bolýy múmkin degen ártúrli alyp-qashpa pikir aitylýda.
Sondyqtan qazirgi Prezident 5 jyldan keiin taǵy da 7 jylǵa barýy múmkin degen kúmándi seiiltý úshin biyl birden 7 jyldyq merzimge sailanǵany durys bolar edi dep oilaimyz. Sonda atalǵan quqyqtyq kolliziia týyndamaidy.
Onyń ústine, Memleket basshysy kezekten tys sailaý ótkizbei, eki merzimge sailansa da, biyl kezekten tys sailaýda 7 jylǵa sailansa da, onyń ókilettik merzimi 2029 jyly aiaqtalady. Iaǵni qazirgi Prezident merziminiń uzaqtyǵy ózgerissiz qalady.
Tórtinshi. Biz, burynǵy júieni qalyptastyrǵan saiasi kúshterdiń, yqpaldy top ókilderiniń bilikke umtylyp otyrǵanyn umytpaýymyz qajet. Prezidenttiń qazir sailaý ótkizip jáne jeti jyl merzimge sailanýy memleketimizdiń qaýipsizdigi men turaqtylyǵyn qamtamasyz etýge múmkindik beredi. Ol jańa inkliýzivti azamattyq qoǵam qurýǵa múmkindik alady.
Osy jaǵdailardyń bárin eskere otyryp, «Jańa Qazaqstan» depýtattyq toby mynadai málimdeme jasaidy:
Birinshiden, biz Qazaqstan Respýblikasy Prezidentin jeti jylǵa bir merzimge sailaý bastamasyn qoldaimyz.
Ekinshiden, Konstitýtsiiaǵa ózgeristerdi qazir engizip, Prezident sailaýyn jańa talaptarǵa sáikes osy jyldyń kúzinde ótkizý qajet dep sanaimyz.
Jalpy, bul memlekettik basqarý júiesin jańǵyrtyp, elimizdi ornyqty damytýǵa jol ashatyn mańyzdy qadam.
Úshinshiden, Konstitýtsiiamyzǵa ózgeris engizetin bolsaq, onda osy múmkindikti paidalana otyryp, Ata Zańǵa taǵy bir asa mańyzdy máseleni engizý kerek. Ol – elordanyń atyn qaita qaitarý. Adamnyń kózi tirisinde qalaǵa onyń esimin bergen durys dep eseptemeimiz jáne de qalanyń jańa ataýyn halyqta qabyldamady.
Sondyqtan Tuńǵysh Prezidenttiń ózi usynǵan Astana ataýyn qaita qalpyna keltirý tarihi ádildik bolar edi.
Bul - Tuńǵysh Prezidenttiń bas qalamyzdyń qurylysyn saldyrýdaǵy eńbegin de baǵalaý jáne halqymyzdyń usynys-pikirin de eskerý.
"Qadirli aǵaiyn! Qai zamanda da el basyna kún týǵanda, halqymyz bir basshynyń ainalasyna toptasyp, qiyndyqtardan da, synaqtardan da aman-saý shyqqan. Qazaqta «Altaý ala bolsa aýyzdaǵy ketedi, tórteý túgel bolsa tóbedegi keledi» degen jaqsy sóz bar. Qazir – arazdasatyn ýaqyt emes, birigetin ýaqyt, talasatyn ýaqyt emes, tatýlasatyn ýaqyt!" - dep aiaqtalady halyq qalaýlysynyń málimdemesi.
