Búgin 2020 jylǵy 12 tamyzdaǵy sailaýda sailanǵan QR Parlamenti Senatynyń depýtattaryn tirkeý máselesi boiynsha QR Ortalyq sailaý komissiiasynyń otyrysy ótti, dep habarlaidy "Ult aqparat".
Otyrysty ashqan Ortalyq sailaý komissiiasynyń tóraǵasy Berik Imashev Parlament Senatynyń depýtattaryn sailaý jónindegi naýqannyń sońǵy otyrysy Konstitýtsiianyń 25 jyldyǵy – Táýelsiz Qazaqstannyń Negizgi Zańy qarsańynda ótip jatqanyn atap ótti.
Ortsailaýkom múshesi Serik Sydyqov «2020 jylǵy 12 tamyzdaǵy sailaýda sailanǵan QR Parlamenti Senatynyń depýtattaryn tirkeý týraly» baiandama jasady. Ol «Qazaqstan Respýblikasyndaǵy sailaý týraly» Konstitýtsiialyq zańǵa sáikes, Ortalyq sailaý komissiiasy Konstitýtsiialyq zańda belgilengen tártippen Parlamenttiń sailanǵan depýtattaryn tirkeýdi júrgizetinin habarlady. Osy oraida Ortsailaýkom árbir depýtatqa belgilengen úlgidegi kýálik pen omyraýǵa taǵatyn belgini tapsyrady.
Osyǵan bailanysty «2020 jylǵy 12 tamyzdaǵy sailaýda sailanǵan QR Parlamenti Senatynyń depýtattaryn tirkeý týraly» qaýly qabyldandy.
Qaýly qabyldanǵannan keiin Ortalyq sailaý komissiiasynyń tóraǵasy Berik Imashev tirkelgen depýtattarǵa kýálikter men tósbelgilerdi tabys etti.
«Qazaqstan Respýblikasynyń Parlamenti jáne onyń depýtattarynyń mártebesi týraly» Qazaqstan Respýblikasy Konstitýtsiialyq Zańynyń 24-babynyń 1-tarmaǵyna sáikes, Parlament depýtatynyń ókilettigi ony Ortalyq sailaý komissiiasy Parlament depýtaty retinde tirkegen kezden bastalady.
Otyrysqa Parlament Senatynyń sailanǵan depýtattary, senatorlar Keńesiniń múshesi Qýanysh Aitahanov, sondai-aq beine konferentsiia bailanys rejiminde oblystardyń, Nur-Sultan, Almaty jáne Shymkent qalalarynyń aýmaqtyq sailaý komissiialary, onlain rejimde buqaralyq aqparat quraldarynyń ókilderi qatysty.
