Túrkistan oblysynda Saýran aýdanynyń qurylýyna bailanysty saltanatty shara ótti. Jiynda aýdan shekarasy anyqtalyp, aldaǵy josparlar jariia etildi, dep habarlaidy "Ult aqparat".
Jańa Saýran aýdanynyń ákimshilik ortalyǵy Shornaq aýyly bolady. Aýdannyń ákimshilik-aýmaqtyq quramyna Shaǵa, Jańa Iqan, Eski Iqan, Úshqaiyq, Iassy, Oranǵai, Qarashyq, Júinek, Babaiqorǵan, Shornaq, Jibek joly, Maidantal aýyldyq okrýgteri kiredi.
Qoldanystaǵy zańdarǵa sáikes, ákimshilik qurylymyn jasaqtaý úshin aldymen aýdandyq máslihat qurylmaq.
Keiinnen máslihat kelisimimen, aýdan ákimi taǵaiyndalady. Aýdandy basqarý júiesi jáne biýdjeti bekitilmek. Quqyq qorǵaý organdary men ministrlikterdiń aýdandyq bólimsheleri óz qyzmetin bastaidy dep josparlanǵan.
Aita keteiik, Túrkistan oblysy qurylǵaly bul aýyl ákimdikteri Kentaý qalasynyń qaramaǵyna ótken bolatyn.
Aimaq basshysy Ómirzaq Shókeev saltanatty sharada jergilikti turǵyndarmen kezdesip, aldaǵy josparlarymen bólisti.
«Kezinde iri saýda ortalyǵy negizinde qurylyp, Aq ordanyń astanasy bolǵan Saýran ataýy óziniń tarihi mártebesin qaita aldy. Uly Jibek jolynyń boiynda ornalasqan, tarihy Túrkistan uǵymymen bite qainasyp jatqan ortaǵasyrlyq Saýran qalasynyń ataýyn jańa aýdanǵa berý Ulystyń uly kúni qarsańyndaǵy eldi qýantqan erekshe oqiǵa dep bilemin», – dedi oblys ákimi.
Al, jańa aýdannyń qurylýyna bailanysty atqarylatyn barlyq is-sharalardyń júzege asýymen arnaiy komissiia ainalysady.
Oblys ákimi óz sózinde jańa aýdannyń damý jospary jaily bólisti. Shornaq aýyly aýdan ortalyǵy retinde damidy.
Jańa aýdandy qurý arqyly aýdan quramyna enetin eldi mekenderdegi memlekettik qyzmetterdi alý sapasyn kóterýge jol ashylady.
Áleýmettik máseleler oń sheshimin taýyp, jańa jumys oryndarynyń ashylýy sekildi mańyzdy máselelerge basymdylyq beriledi.
Aýyl sharýashylyǵy salasynyń qarqyndy damýyna kúsh salynbaq. Quqyq qorǵaý organdary men ministrlikterdiń aýdandyq bólimsheleri óz qyzmetin bastaidy.
Oblys ákimi atap ótkendei, aldaǵy 1-2 jyldyń kóleminde barlyq ákimshilik, áleýmettik nysandardyń qurylysy bitip, paidalanýǵa beriledi dep josparlanýda.
Al ázirge bul memlekettik organdar men aýdan ákimdigin qosa alǵanda ýaqytsha jekelegen nysandardy jalǵa alyp, jumysyn júrgizedi.
Jańadan qurylatyn aýdan halqynyń sany 100 myńnan asady.
