Qaraǵandy oblysy Jańaarqa kentiniń jalpy bilim beretin mektebinde Qazaqstannyń eńbek sińirgen qairatkeri Aqseleý Seidimbektiń murajaiy ashyldy. Onda qoǵam qairatkeri, belgili etnograf, ónertanýshy, jýrnalist jáne pýblitsistiń eńbekteri, ómirbaiandyq derekteri, jeke zattary jinaqtalǵan, dep habarlaidy QazAqparat tilshisi.
«Ótken jyly mektebimizge jerlesimiz Aqseleý Seidimbektiń esimi berildi.
Karantin men qashyqtyqtan oqytýdyń saldarynan biz onyń murajaiyn birden asha almadyq. Esesine muny Táýelsizdiktiń mereitoilyq jylynda júzege asyra aldyq. Murajaida Aqseleý Seidimbektiń ómiri týraly stendter, ol týraly maqalalar, eńbekteri, oqýshylardyń ǵylymi jumystary men fotosýretteri usynylǵan», – dedi mekteptiń tarih pániniń muǵalimi Jadyra Rysbekova.
Murajaida jazýshynyń qalta pyshaǵy jáne onyń keibir jeke zattary bar.
Bolashaqta mektep oqýshylary Aqseleý Seidimbektiń ómiri men eńbek jolyn murajaida jinaqtalǵan qujattar men ol týraly maqalalarǵa súiene otyryp zerttei alady.
Aqseleý Seidimbek – Jańaarqa aýdanynyń týmasy. Kóp jyldar boiy «Ortalyq Qazaqstan» gazetinde eńbek etti. 1976 jyldan respýblikalyq «Sotsialistik Qazaqstan» basylymynda ádebiet jáne óner bóliminiń meńgerýshisi bolyp jumys istedi.
Sondai-aq, ol «Zerde» jýrnalynda, «Álem» almanahynda, Muhtar Áýezov atyndaǵy Ádebiet jáne óner institýtynda basshylyq qyzmetter atqardy.
Ybyrai Altynsarin atyndaǵy bilim berý institýtynyń direktory, Qazaq bilim akademiiasynyń tuńǵysh Prezidenti, Prezidenttik mádeni ortalyq direktorynyń
orynbasary boldy. L. N. Gýmilev atyndaǵy Eýraziia ulttyq ýniversitetinde dáris berdi.
2003 jyly oǵan Qazaqstannyń eńbek sińirgen qairatkeri ataǵy berildi. 2004 jyly ol Memlekettik syilyqtyń laýreaty atandy.
