Jańaarqa aýdanynyń turǵyndary Qaraǵandy oblysynyń aýrýhanalaryna 5 tonnadan astam qymyz jinady, dep habarlaidy "Ult aqparat".
«Bul qazir aýyryp qalǵandar men meditsinalyq mekemelerdiń qyzmetkerleri úshin qolymyzlan keletin eń az kómek. Qymyz ben saýmal dárýmenderge bai jáne paidaly qasietterge ie. Olar emdelýshilerge de, dárigerlerge de kúsh beredi dep úmittenemiz», - deidi jańaarqalyq turǵyndar.
Ótken jumada Eraliev aýylynyń turǵyndary Qaraǵandyǵa 1 tonna qymyz ben 200 kg qurt alyp keldi. Osynshama kólemde shipaly sýsyndy Eraliev turǵyndary bir kúnde jinady! Bul sút ónimderi oblys ortalyǵynyń tórt aýrýhanasyna bólindi.
Atalmysh igi isti aýyl turǵyny Erlan Túsipov uiymdastyrdy. Al jeke kásipker Qairat Ómirbekov qymyzdy Qaraǵandyǵa tegin jetkizdi.
«Qazaq qymyzy ejelden myńdaǵan aýrýǵa shipa bolǵan. Biz naýqastarǵa aýrýdy jeńýge jáne virýspen kúndiz jáne túnde kúresip jatqan dárigerlerge kúsh bergimiz keledi» - dep Eraliev aýylynyń turǵyndary qaraǵandylyqtarǵa tilekterin bildirdi.
Sondai-aq, Jańaarqa aýdanynyń turǵyndary qurbandyq shalý rásimin ótkizdi. Muqtajdarǵa et taratylyp, aýdan aýrýhanalaryna ystyq taǵamdar taratyldy.
Jalpy bir apta aralyǵynda Jańaarqa aýdanynyń turǵyndary Qaraǵandy, Temirtaý, Abai, Jezqazǵan, Sátbaev, Nura jáne Jańaarqa aýdandarynyń aýrýhanalaryna 5 tonnadan astam qymyz, bir tonnaǵa jýyq qurt, irimshik, saýmal jinap, jetkizdi.
Jańaarqalyqtar koronavirýspen kúresetin adamdarǵa jaqsylyq jasaýdy ári qarai da jalǵastyrýdy josparlap otyr.
