Qazaqstan Respýblikasy Eńbek jáne halyqty áleýmettik qorǵaý ministrligi mamandarynyń boljamy boiynsha 4 nemese odan kóp balasy bar 340,3 myń otbasy kópbalaly bolýyna bailanysty memlekettik járdemaqyǵa úmitker bola alady, - dep habarlaidy Ult portaly.
Aita keterligi, atalǵan járdemaqy engizilgennen bastap Qazaqstandaǵy kópbalaly otbasylar sanynyń artýyna bailanysty alýshylar sany da kóbeiýi múmkin.
Atalǵan memlekettik járdemaqyny engizý Memleket basshysynyń aǵymdaǵy jylǵy 2 qyrkúiektegi Qazaqstan halqyna Joldaýynda aitylǵan tapsyrmasy boiynsha QR Eńbekmini ázirlegen ataýly áleýmettik kómek kórsetýdiń jańa tetikterinde (budan ári – AÁK) kózdelgen tabysy az jáne kópbalaly otbasylardy qoldaýdyń negizgi úsh baǵytynyń biri bolyp tabylady. Taiaýda QR Eńbekmini tiisti zań jobasyn Qazaqstan Respýblikasy Parlamentiniń qaraýyna engizýdi josparlap otyr.
«Joǵaryda atalǵan memlekettik járdemaqy 4 nemese odan da kóp kámeletke tolmaǵan nemese 23 jasqa deiingi kúndizgi bólimde oqityn balalary bar barlyq kópbalaly otbasylarǵa tabysyna qaramastan tólenedi dep josparlanýda. Memlekettik járdemaqynyń mólsheri bala sanyna qarai saralanady. Iaǵni, 4 balasy bar otbasylarǵa 42 500 teńge, 5 balaǵa – 53 125 teńge, 6 balaǵa – 63 750 teńge, 7 jáne odan da kóp balalarǵa 74 375 teńge tólenedi. Orta eseppen alǵanda, járdemaqy mólsheri ár balaǵa 10-11 myń teńgeni quraidy, bul 2018 jyldan bastap taǵaiyndalmaityn osyǵan uqsas járdemaqydan 4-7 esege kóp» delingen habarlamada.
Aita keterligi, Qazaqstanda búginde bala sany 7-den asatyn 3151 otbasy bar. «Altyn alqa», «Kúmis alqa» alqalarymen marapattalǵan nemese buryn «Batyr ana» ataǵyn alǵan jáne «Ana dańqy» ordenimen marapattalǵan kópbalaly analarǵa jeke memlekettik járdemaqy tólenedi, olardyń ortasha mólsheri 16 160 teńgeni quraidy. Aǵymdaǵy jylǵy 1 qazandaǵy jaǵdai boiynsha ony 235 myńǵa jýyq adam alady. Bul memlekettik járdemaqynyń tólenýi saqtala bermek.
Budan buryn habarlanǵandai, aǵymdaǵy jylǵy 7 qazanda QR Úkimeti otyrysynda Eńbek jáne halyqty áleýmettik qorǵaý ministri Birjan Nurymbetov Qazaqstanda 2020 jylǵy 1 qańtardan bastap engizý josparlanyp otyrǵan AÁK kórsetýdiń jańa tetikterin tanystyrǵan bolatyn.
«Eń basty printsip – memleket kómekke muqtaj adamdarǵa, ásirese balalar men kópbalaly otbasylarǵa kómektesedi! Eńbekke qabiletti azamattar jumys isteýi kerek. Memleket jumysqa ornalasýǵa nemese shaǵyn biznespen ainalysýǵa kómektesedi. Memlekettik kómekke – kópbalaly otbasylardy qoldaý, tabysy tómen otbasylarǵa ataýly áleýmettik kómek kórsetý, tabysy az otbasylardaǵy balalarǵa beriletin kepildendirilgen áleýmettik paket kiredi» dedi Birjan Nurymbetov.
Ministrdiń aitýynsha, kópbalaly otbasylarǵa qoldaý kórsetý respýblikalyq biýdjetten memlekettik járdemaqylar engizý arqyly qamtamasyz etiletin bolady. Bul memlekettik járdemaqy barlyq kópbalaly otbasylarǵa (4 nemese odan da kóp kámeletke tolmaǵan balasy bar) tabysyna qaramastan tólenedi.
AÁK tabysy az otbasylarǵa, sonyń ishinde kópbalaly otbasylarǵa tólenetin bolady. Eń tómen kúnkóris deńgeiiniń 70%-y taǵaiyndaýdyń shekti kriteriii bolyp qala beredi. Eger eńbekke qabiletti otbasy múshesi usynylǵan jumystan jáne jumyspen qamtýǵa járdemdesý sharalarynan bas tartsa, onda AÁK tólemi tek oǵan ǵana emes, búkil otbasyna da toqtatylady
Tabysy az otbasylardan shyqqan balalar úshin kepildendirilgen áleýmettik paketti engizý usynylady. 1 jastan 6 jasqa deiingi balalardy azyq-túlik jiyntyǵymen jáne gigienalyq quraldarmen, 6 jastan 18 jasqa deiingi balalardy mektepterde ystyq tamaqpen, oqý quraldarymen jáne mektep kiimimen qamtamasyz etedi, sondai-aq olarǵa mektepke deiingi jol júrý shyǵyndary óteledi. Meditsinalyq, onyń ishinde stomatologiialyq kómek 18 jasqa deiingi balalarǵa tegin meditsinalyq kómektiń kepildik berilgen kólemi jáne mindetti áleýmettik meditsinalyq saqtandyrý sheńberinde kórsetiletin bolady.
