QR Aqparat jáne qoǵamdyq damý ministri Dáýren Abaev jumyspen qamtýdyń jańa Jol kartasy aiasynda iske asyrylatyn jumystardy túsindirdi, dep habarlaidy QazAqparat.
«Búgin Premer-Ministrdiń tóraǵalyǵymen Memlekettik komissiianyń otyrysy ótti. Osy oraida birqatar máseleler qaralyp, onyń ishinde jumyspen qamtýdyń Jol kartasyn júzege asyrý talqylandy. Bólingen bir trillion teńgeniń 970 mlrd teńgege jýyǵy óńirler arasynda bólindi», - dedi ministr «Habar 24» telearnasynyń tikelei efirinen.
Baǵdarlama áleýmettik, kóliktik infraqurylymdy, TKSh nysyndaryn jańartý men eldi mekenderdi abattandyrý arqyly jumys oryndaryn qurýǵa baǵyttalǵan.
«Budan bólek, jańa nysandardyń qurylysy eskerilgen. Osy rette 147 áleýmettik nysan, 56 turǵyn úi men jataqhana, 75 sýmen qamtamasyz etý nysany, 33 gazben qamtý nysany, 42 elektr energiiasymen qamtamasyz etý nysany jáne basqa da qurylystar iske asyrylmaq», - dedi vedomstvo basshysy.
Belgili bolǵandai, 73 myń jumys ornyn qura otyryp, 2,5 myńnan astam áleýmettik nysanda tiisti jumystar atqarylady. Bul turǵyda mektepter, aýrýhanalar, sport keshenderi men mádeniet úileri qamtylady. TKSh-nyń 979 nysany jańartylady, iaǵni sý qubyrlary, jylýmen qamtamasyz etý men sý burý júiesi jóndeledi. Jalpy, 7 myńnan astam joba iske qosylyp, 240 myńǵa jýyq jumys orny qurylady.
