Amerikalyq astronavt Kristina Kýk ǵaryshta eń uzaq ýaqyt bolǵan áielder arasynda rekord ornatty, dep habarlaidy QazAqparat tilshisi.
Amerikalyq Montan shtatynan shyqqan 40 jastaǵy injener-elektrik Baiqońyr ǵarysh ailaǵynan reseilik ǵaryshker Aleksei Ovchinin men amerikalyq astronavt Nik Heigpen birge 2019 jyldyń 14 naýryzynda Halyqaralyq ǵarysh stantsiiasynda (HǴS) boldy. Kristina Kýk HǴS-da 288 kún jumys istep, isin áli de jalǵastyrýda. Bul - HǴS burynǵy komandiri, áiel-astronavt Peggi Ýitson 2016-2017 jyldary ornatqan aldyńǵy rekord merzimi.
Kýk ǵaryshta jalpy 328 kúnin, iaǵni 11 aiyn ótkizedi dep boljanýda. Aita keteiik, NASA 2019 jyldyń sáýirinde Kýktyń jarty jyldyq ǵarysh missiiasyn bes aiǵa deiin, 2020 jyldyń aqpanyna deiin uzartý týraly jariialaǵan bolatyn.
«Bul alys ǵaryshty zertteý boiynsha bolashaq missiialardy, sondai-aq Ai men Marsqa arnalǵan missiialardy qoldaý úshin qajetti uzaq ǵaryshtyq ushýlardyń saldarlary týraly bilýge múmkindik beredi», dep atap ótti NASA.
Ǵaryshta bolý boiynsha álemdik rekord burynǵysha reseilik ǵaryshker, dáriger Valerii Poliakovtyń enshisinde qala beredi. Ol 1990 jyldary «Mir» ǵarysh stantsiiasynyń bortynda jumys istei otyryp, 15 ai (438 táýlik) bolyp rekord ornatqan bolatyn.
Amerikalyq astronavtardyń eń uzaq ǵaryshtyq ushý boiynsha rekordy Skott Kellige tiesili. Ol 2015-2016 jyldary HǴS-da 340 kún ótkizgen.
