Foto: QR OAM
1 qyrkúiekten bastap elimizdiń barlyq bilim berý uiymdarynda jeke qaýipsizdik sabaqtary qaita bastalady, dep habarlaidy Ult.kz.
Bul sabaqtar balalardyń túrli ómirlik jaǵdailarda durys áreket etýge qajetti praktikalyq daǵdylaryn qalyptastyrýǵa jáne jeke qaýipsizdikke jaýapkershilikpen qaraýyn damytýǵa baǵyttalǵan.
Sabaqtar balabaqshalardan bastap kolledjderge deiin bilim berýdiń barlyq deńgeiin qamtidy. Ár jas ereksheligine sáikes bólek blok ázirlengen:
- • balabaqsha — jedel qyzmet nómirlerin bilý, oiyn jáne demalys alańdaryndaǵy qaýipsizdik erejeleri;
- • bastaýysh synyptar — sýdaǵy jáne muzdaǵy qaýipsizdik, beitanys adamdarmen kezdeskende ózin ustaý, qańǵybas itterden qorǵaný;
- • orta býyn synyptary — býlling pen kiberbýlling, qaýipti internet-áýestenýler, beitanystardyń usynystarynan bas tartý, óz is-áreketine jaýapkershilikti qalyptastyrý;
- • joǵary synyptar men kolledjder — qarjylyq saýattylyq, alaiaqtardan qorǵaný, onlain-oiyndardaǵy táýekelder, eńbek qaýipsizdigi, óz quqyqtary men mindetterin bilý, jeke áreketteri úshin jaýapkershilik.
- Sabaqtar ár aptada synyp saǵaty aiasynda 10 minýttan ótkiziledi jáne taqyryptar jylyna úsh ret qaitalanady.
Baǵdarlamany iske asyrý barysynda úsh kezeńdi monitoring júrgizildi. Onyń ishinde pedagogter men psihologtarǵa arnalǵan keńester men vebinarlar uiymdastyryldy, sondai-aq politsiia, TJM jáne densaýlyq saqtaý ókilderi tartyldy. Anketa alý, jobalar, beinerolikter jáne ózge de interaktivti ádister qoldanyldy.
«Tájiribe kórsetkendei, mundai sabaqtar balalardyń mazasyzdyǵyn tómendetip, qaýipsiz minez-qulyq daǵdylaryn qalyptastyrady jáne olardy ómirdegi, onlain ortadaǵy kúrdeli jaǵdailarda durys áreket etýge úiretedi», – dep atap ótti QR Oqý-aǵartý ministrligi Balalardyń quqyqtaryn qorǵaý komitetiniń tóraiymy Nasymjan Ospanova.
Eske sala keteiik, jeke qaýipsizdik sabaqtary 2023–2025 jyldarǵa arnalǵan balalardy zorlyq-zombylyqtan qorǵaý, sýitsidtiń aldyn alý jáne olardyń quqyqtary men salamattylyǵyn qamtamasyz etý jónindegi keshendi jospar aiasynda engizilgen.
