OSK Abai, Jetisý jáne Ulytaý oblystaryndaǵy Parlament Senaty depýtattarynyń sailaýyn uiymdastyrý jáne ótkizý máselelerin talqylady, - dep habarlaidy Tengrinews.kz.
OSK tóraǵasy Nurlan Ábdirov Qazaqstan Respýblikasy Prezidentiniń 2022 jylǵy 11 shildedegi Jarlyǵymen Abai, Jetisý jáne Ulytaý oblystarynan Qazaqstan Respýblikasy Parlamenti Senatynyń depýtattaryn sailaý 2022 jylǵy 24 tamyzǵa taǵaiyndalǵanyn atap ótti.
"Qazaqstan Respýblikasynyń Konstitýtsiiasyna sáikes Senatty Konstitýtsiialyq zańda belgilengen tártippen Qazaqstan Respýblikasynyń ár oblysynan, respýblikalyq mańyzy bar qalasynan jáne astanasynan eki adamnan ókildik etetin depýtattar quraidy. Senat depýtattaryn janama sailaý quqyǵy negizinde jasyryn daýys berý arqyly tańdaýshylar – máslihattar depýtattary sailaidy, olardy óz kezeginde jalpy sailaýda Qazaqstan Respýblikasynyń azamattary sailaidy", - delingen habarlamada.
Úsh oblystyń árqaisysynan 2 depýtat sailanady: olardyń bireýi – 2017 jylǵy 28 maýsymda sailanǵan depýtattardyń ókilettik merzimine; ekinshisi – 2020 jylǵy 12 tamyzda sailanǵan depýtattardyń ókilettik merzimine sailanady.
Konstitýtsiiaǵa sáikes, otyz jasqa tolǵan jáne el aýmaǵynda sońǵy on jylda jáne tiisti oblys aýmaǵynda keminde úsh jyl turaqty turyp jatqan Qazaqstan Respýblikasynyń azamaty Parlament Senatynyń depýtaty bola alady. Sonymen qatar, úmitkerdiń joǵary bilimi jáne keminde bes jyl jumys ótili bolýy kerek.
"Sot áreketke qabiletsiz dep tanyǵan azamattardyń sailaýǵa jáne sailanýǵa quqyǵy joq. Sottylyǵy zańda belgilengen tártippen ótelmegen nemese alynbaǵan adam, sondai-aq zańda belgilengen tártippen sybailas jemqorlyq qylmys jáne sybailas jemqorlyq quqyq buzýshylyq jasaýda kinásin sot tanyǵan adam Qazaqstan Respýblikasy Parlamenti Senatynyń depýtattyǵyna kandidat bola almaidy", - dedi OSK ókilderi.
Kandidattardy usyný 2022 jylǵy 13 shildeden bastap 30 shilde saǵat 18-ge deiin júrgiziledi. Qazaqstan Respýblikasy Parlamenti Senatynyń depýtattyǵyna kandidatty usynýdy máslihattar, sondai-aq ózin-ózi usyný tártibimen júzege asyrady. Tirkeý – 2022 jylǵy 3 tamyz saǵat 18.00-ge deiin.
"Qazaqstan Respýblikasy Parlamenti Senatynyń depýtattyǵyna kandidattardy tirkeýdi oblystyq, qalalyq nemese aýdandyq máslihattyń depýtattyqqa kandidat etip usyný týraly sheshimi (máslihat usynǵan jaǵdaida); depýtattyqqa kandidat bolyp daýysqa túsýge kelisimi (nieti) týraly ótinishi; tiisti sailaý komissiiasynyń kandidatty qoldap qoiǵan tańdaýshylardyń qoldaryn tekserý nátijeleri týraly hattamasy; kandidattyń ómirbaiandyq derekteri; kandidattyń jáne onyń jubaiynyń (zaiybynyń) aktivteri men mindettemeleri týraly deklaratsiialar tapsyrǵany týraly memlekettik kiris organynyń anyqtamasy; kandidattyń 900 000 teńge kólemindegi sailaý jarnasyn engizgenin kýálandyratyn qujat bolǵan kezde oblystyq sailaý komissiialary júzege asyrady", - delingen habarlamada.
Eger sailaý qorytyndylary boiynsha kandidat Parlament Senatynyń depýtaty bolyp sailanǵan nemese daýys berý qorytyndylary boiynsha kandidat daýys berýge qatysqan tańdaýshylar daýysynyń keminde bes paiyzyn alǵan jaǵdailarda, sondai-aq kandidat qaitys bolǵan jaǵdaida engizilgen jarna kandidatqa qaitarylady. Qalǵan barlyq jaǵdailarda engizilgen jarna qaitarylýǵa jatpaidy jáne respýblikalyq biýdjet kirisine alynady.
Sailaý aldyndaǵy úgit 2022 jylǵy 3 tamyz saǵat 18.00-den bastap 23 tamyz saǵat 00.00-ge deiin jalǵasady. Tynyshtyq kúni – 2022 jylǵy 23 tamyz. Daýys berý kúni – 2022 jylǵy 24 tamyz.
Senat depýtaty sailaýyndaǵy daýystardy sanaý nátijeleri daýys berýge arnalǵan pýnktte ótkiziletin tiisti sailaý komissiiasynyń otyrysynda belgilenedi.
"Qaýlyda kandidattyń: teledidar men radio boiynsha baǵdarlamalarymen sóz sóileýine, sondai-aq merzimdi baspa basylymdarynda 2 maqala jariialaýǵa - 350 000 teńge somasynda; sailaý aldyndaǵy jariia is-sharalardy ótkizýge jáne úgit materialdaryn shyǵarýǵa - 70 000 teńge somasynda; kólik shyǵystaryna - 80 000 teńge somasynda shyǵystar mólsheri belgilengen", - delingen habarlamada.
