© Photo: QR Úkimetiniń baspasóz qyzmeti
Úkimettiń 2023 jyldaǵy alǵashqy otyrysy jańa ministrlerdiń ant berý rásiminen bastaldy, dep habarlaidy Sputnik Qazaqstan.
Ádilet ministri Azamat Esqaraev, indýstriia jáne infraqurylymdyq damý ministri Marat Qarabaev, ekologiia jáne tabiǵi resýrstar ministri Zúlfiia Súleimenova, mádeniet jáne sport ministri Ashat Oralov jáne oqý-aǵartý ministri Ǵani Beisembaev Qazaqstan halqyna ant berdi.
"Qazaqstan Respýblikasynyń halqy men Prezidenti aldynda, óz Otanym – Qazaqstan Respýblikasynyń ekonomikalyq jáne rýhani damý isine barlyq kúsh-jigerim men bilimimdi jumsaýǵa, memlekettiń Konstitýtsiiasy men zańdaryn qatań saqtaýǵa, ózimniń barlyq is-áreketimde zańdylyq pen ádilettik, azamattyq, ultaralyq, konfessiiaaralyq tatýlyq printsipterin ustanýǵa, Qazaqstan halqyna adal qyzmet etýge, óz elimniń memlekettiligi men dúniejúzilik qaýymdastyqtaǵy bedelin nyǵaita berýge saltanatty túrde ant etemin", - dedi sý jańa ministrler Úkimet otyrysynda.
Eske salsaq, 4 qańtarda Prezident Úkimet quramyn jańartty. Ministrler kabineti alty jańa esimmen tolyqty, qalǵan ministrler óz ornynda qaldy.
Ǵalymjan Qoishybaev Qazaqstan Premer-ministriniń orynbasary – Úkimet apparatynyń basshysy laýazymyna taǵaiyndaldy.
Zúlfiia Súleimenova Serikqali Brekeshevtiń ornyna keldi. Ol qaita qurylǵan Ekologiia jáne tabiǵi resýrstar ministrligin basqardy. Aita keteri, Súleimenova endi Úkimettegi eń jas ministr, 32 jasta.
Indýstriia jáne infraqurylymdyq damý ministrligine Qaiyrbek Óskenbaevtyń ornyna Marat Qarabaev keldi.
Oqý-aǵartý ministri bolǵan Ashat Aimaǵambetovti Ǵani Beisembaev almastyrdy. 1990 jylǵy Ashat Oralov Mádeniet jáne sport ministri bolyp taǵaiyndaldy.
