1 shildeden beri ákimshilik ádilet sottary ákimdikterge 58 aqshalai aiyppul saldy. Bul týraly QR Joǵarǵy Sotynyń ákimshilik ister jónindegi sot alqasynyń tóraǵasy Qanat Mýsin aityp berdi, dep habarlaidy QazAqparat tilshisi.
2021 jyly 1 shildede qabyldanǵan Ákimshilik rásimdik-protsestik kodekste sot júiesine birqatar jańashyldyq engizilgen edi.
«Ákimshilik protsestegi mańyzdy institýt – aqshalai óndirip alý bolyp otyr. Bul – burynǵy zańnamada bolmaǵan jańa qural. Ákimshilik kodeks engizilgenge deiin sottar isti qaraý barysynda quqyqbuzýshylarǵa tek eskertý ǵana jasai alatyn. Endi sýdianyń qolynda aqshalai óndirip alý siiaqty qural bar. Bul qural protseske qatysýshylardy, onyń ishinde memlekettik organdardy da tártipke keltirýge yqpal etedi», - dedi Qanat Mýsin Ortalyq kommýnikatsiialar qyzmetindegi baspasóz máslihatynda.
Onyń aitýynsha, tórt aidyń ishinde sýdialar 175 aqshalai aiyppul salǵan. Jalpy aiyppul kólemi 6 mln teńgeni qurasa, onyń shamamen 5 mln teńgesi biýdjetke túsip úlgerdi.
«Aqshalai óndirip alý týraly sot sheshimine shaǵymdanýǵa bolady, biraq aldymen bul aiyppul tólenýi kerek. Sondyqtan qazir jaýapkerler men memlekettik organdar anaǵurlym tártipti bola bastady. Óitkeni aqshalai óndirip alý somasy 10 AEK-ten bastalyp, 100 AEK-ke deiin jetedi. Bul aitarlyqtai qomaqty aqsha», - deidi Qanat Mýsin.
Sonymen birge, spiker aqshalai óndirip alý jaýapkershiligi kimderge salynǵanyn aityp berdi.
«140 aqshalai aiyppul jaýapkerdiń tarapyna salyndy. Ádette, bul ákimshilik organdar nemese jeke sot oryndaýshylary. Mysaly, memlekettik organdar men jergilikti atqarýshy organdardyń qyzmetkerlerine jalpy 97 aqshalai jaza qoldanyldy. Onyń ishinde ministrlikterdiń biriniń komitet tóraǵasy, Ishki memlekettik aýdit departamentiniń, Memlekettik kirister departamentiniń, politsiia departamentiniń basshysy jáne t.b. siiaqty sheneýnikter bar. Iaǵni, munda qarapaiym qyzmetker joq. Ákimdik qyzmetkerlerine 58 aqshalai aiyppul salyndy, onyń ishinde 6 qala ákimi, bes aýdan ákimi jáne úsh apparat basshysy bar», - dedi Qanat Mýsin.
