Jambyl oblysynda bilim salasyndaǵy qyzmetkerlerdi koronavirýsqa qarsy vaktsinatsiialaý júrgizilýde. Onyń barysy týraly óńirlik kommýniiialar qyzmetiniń aqparat alańynda oblystyq bilim basqarmasynyń basshysy Gúlnar Hodjabergenova aityp berdi, - dep habarlaidy "Ult aqparat".
El Prezidenti Qasym-Jomart Toqaevtyń tapsyrmasyna sáikes 1 aqpannan bastap qazaqstandyqtarǵa ekpe salyna bastady. Al naýryz aiynan elimizdegi pedagogtarǵa ekpe saldyrý naýqany bastalǵan bolatyn.
«Búginge deiin óz erkimen ótinish bildirgen oblystaǵy 1068 bilim salasynyń qyzmetkeri erikti túrde ekpe saldyrdy. Onyń ishinde balabaqsha tárbieshileri, bastaýysh synypqa sabaq beretin pedagogtar, kolledj ustazdary, bilim basqarmasy men bilim bólimderiniń qyzmetkerleri bar. Búgingi kúni ekpe saldyrǵan pedagogtardyń densaýlyǵy qalypty. Qandai da bir keri áserleri bolǵan joq»,-dedi basqarma basshysy.
Aita keteiik, ustaz óz erkimen vaktsina alýǵa jazbasha kelisim bergen soń, aldymen arnaiy ekpe úshin daiyndalǵan bólmege baryp densaýlyǵyn teksertedi. Onda dene qyzýy men qan qysymyn ólshetedi. Kinárat bolmaǵan soń birinshi dozasyn qabyldaidy. Keiin 30 minýt dárigerdiń baqylaýynda bolady. Vaktsinany alǵannan keiin de pedagogtar dárigerlerdiń baqylaýynda bolady.
«Óńirdegi pedagogtarǵa ekpe týraly túsindirý jumystary júrgizilgen. Balalardyń ómiri men densaýlyǵynyń qaýipsizdigi úshin ár muǵalim jaýapty. Sondyqtan vaktsina alýdy ár pedagog azamattyq mindeti dep esepteý kerek»,-dedi basqarma basshysy.
